Kokan Nagar World Record : ठाण्यातील वर्तकनगर येथे परिवहनमंत्री प्रताप सरनाईक यांच्या संस्कृती युवा प्रतिष्ठानच्या दहीहंडी उत्सवात ‘कोकण नगरचा राजा’ गोविंदा पथकाने दहा थरांची यशस्वी रचना करून जागतिक विक्रम नोंदवला आहे. या विक्रमाची ‘गिनीज बुक ऑफ वर्ल्ड रेकॉर्ड’ मध्ये नोंद झाली असून, लवकरच सिद्धिविनायक मंदिरात पथकाला प्रमाणपत्र प्रदान केले जाणार आहे. यापूर्वी जय जवान गोविंदा पथकाने नऊ थरांचा विक्रम केला होता.
वर्तकनगर येथे प्रताप सरनाईक फाऊंडेशन आणि संस्कृती युवा प्रतिष्ठान आयोजित संस्कृतीची दहीहंडी उत्सवात पहिले दहा थर रचत ‘कोकणनगरचा राजा’ गोविंदा पथकाने विश्वविक्रमाची नोंद केली. त्यांना २५ लाख रुपयाचे पारितोषिक प्रदान करण्यात आले. यापूर्वीही संस्कृती युवा प्रतिष्ठानच्या उत्सवात जय जवान गोविंदा पथकाने २०१२ साली नऊ थरांचा विश्वविक्रम केला होता. त्याचीही नोंद ‘गिनीज’मध्ये झाली होती. आता तब्बल १३ वर्षानंतर याच मैदानात हा विक्रम झाल्यानंतर पुन्हा एकदा याची दखल ‘गिनीज बुक’ने घेतली आहे. आजचा हा क्षण तर अत्यंत गौरवाचा आहे, असे मत या विक्रमाबाबत परिवहनमंञी प्रताप सरनाईक यांनी व्यक्त केले. कोकण नगरच्या गोविंदांनी मेहनत, जिद्द आणि शिस्त यांची सांगड घालत हा विक्रम केला. मराठी मातीतील या खेळाची जागतिक स्तरावर झालेली नोंद अभिमानास्पद असल्याचे संस्कृती युवा प्रतिष्ठानचे अध्यक्ष तथा युवासेना कार्याध्यक्ष पुर्वेश सरनाईक यांनी सांगितले.
गणेशोत्सवात दुग्धशर्करा योग
सिद्धिविनायक मंदिरात होणाऱ्या या सोहळ्याला गिनीज बुक ऑफ वर्ल्ड रेकॉर्डचे प्रतिनिधी उपस्थित राहणार आहेत. ऐन गणेशोत्सव हा क्षण आल्याने हा दुग्धशर्करा योग असून गणरायासमोर हा सोहळा होणार असल्याचे पुर्वेश सरनाईक यांनी नमूद केले.
लेखकाबद्दलविमल पाटीलविमल पाटील, महाराष्ट्र टाइम्समधून वेब पत्रकारितेला सुरुवात केली, गेले एक वर्ष कन्सलटन्ट म्हणून काम करत आहे. डिजिटल पत्रकारितेत वृत्त संकलन, सोशल मीडियाचे व्यवस्थापन आणि फिल्ड रिपोर्टिंगचा अनुभव आहे. याआधी त्यांनी आर. एन. ओ. वृत्तसंस्थेसाठी फिल्ड रिपोर्टर म्हणून कार्य करत असताना विविध सामाजिक, राजकीय व स्थानिक विषयांवर रिपोर्टिंग केले आहे. तसेच, त्यांनी सामना आणि लयभारी या माध्यमांमध्ये सोशल मीडिया हँडलर म्हणूनही काम पाहिले आहे. त्या मुंबई विद्यापीठाच्या पत्रकारिता विभागातून पत्रकारितेची पदव्युत्तर प्राप्त आहे.… आणखी वाचा