माहेरवाशीण गौरीचा मानपान आणि मनोभावे पूजा करण्यासाठी घरोघरी तयारी सुरु आहे. गौरीच्या पूजेसाठी लागणारे सामान, मुखवटे, मुखवटे सजवण्यासाठी लागणारे साहित्य, ओवश्याची तयारी, सुपांची खरेदी, फळफळावळ, धान्याच्या राशी यासाठी असणारी मागणी वाढती आहे. मुंबईसह उपनगरांमध्ये गौराईच्या आगमनाच्या तयारीसाठी बाजारपेठा सज्ज झाल्या आहेत.

गौरीपूजनासाठी लागणारे दागिने, चंद्रहारा, कोल्हापुरी साजस राणी हार यासारख्या दागिन्यांसह देवीच्या साड्यांनाही मोठी मागणी आहे. प्लास्टर ऑफ पॅरिसपासून शाडूच्या मूर्तीपर्यंत गौरीच्या मुखवट्यापासून फायबरच्या मुखवट्यांनाही वाढती मागणी आहे. गौरीच्या सजावटीसाठी लागणारे साहित्य, पूजासाहित्य, साड्या, मुलांचे कपडे यांच्या खरेदीची लगबग शनिवारी सुरू होती. त्याचबरोबर गौरीला गोडाधोडाचा, पुरणपोळीचा नैवैद्य दाखवण्यासह इतर मिठाया, लाडू, चिवडा यासारखे पदार्थही विकत घेण्यासाठी दुकानांमध्ये महिलावर्गाची गर्दी होती. मोत्याचे इमिटेशनचे दागिने, पूजेची थाळी, फुलांच्या माळा, रंगबिरंगी कागद, डेकोरेशनसाठी दिव्यांच्या माळा यांचीही खरेदी केली जात होती.
Maratha Reservation: आरक्षण तिढा कायम; सरकार-मनोज जरांगे यांच्यातील चर्चेची पहिली फेरी निष्फळ
बाजारात तेजी
गणेशोत्सवाच्या परंपरेमध्ये प्रत्येक वर्षी बदल होत जातात. त्यात अनेक नवनवीन ट्रेण्ड येतात. यंदाही माहेरी येणाऱ्या गौरींना नटण्यासजवण्यासाठी मेकअपचे नाविन्यपूर्ण रंग, लेन्सचा वापर तसेच सुबक नक्षीकाम केलेल्या दागिन्यांचा वापर करण्यात आला आहे. अत्यंत मोहक आणि आकर्षक गौरीच्या मूर्तींना यंदाही मोठी मागणी होती, असे भाविक श्रद्धा पाटील यांनी सांगितले. गौरीचे मुखवटे, स्टँड, आकर्षक साड्या आणि ओवसा भरण्यासाठी सुवासिनींना लागणारे सूप खरेदी करण्यासाठीही शहर आणि उपनगरांतील बाजारांत गर्दी झाली होती. गौरी सजावटीसाठी लागणार्‍या साहित्यासह दागिने, ओटीचे सामान बाजारात उपलब्ध आहे. ओवशासाठी लागणारे बदाम, खारीक खोबरे यांनाही मागणी वाढती होती. फळे व फुलांचा बाजारदेखील शनिवारी तितकाच तेजीमध्ये होता.

ऑनलाइन फराळाला ग्राहकांची पसंती
धबडग्यात नोकरी करणाऱ्या महिलांना गौरीची तयारी तसेच सजावट करण्यासाठी वेळ मिळत नाही त्यामुळे रेडिमेड फराळाला असणारी मागणीही वाढती आहे. फराळाच्या पदार्थांसह पुरणपोळी तसेच मिष्टान्नाच्या पदार्थांची ऑर्डर वाढल्याचे गृहउद्योजिका मोनिका पाटील यांनी सांगितले