कल्याण लोकसभा मतदारसंघाचे शिवसेनेचे खासदार डॉ. श्रीकांत शिंदे यांच्या संकल्पेनतून साकारलेल्या खासदार क्रीडासंग्राम महोत्सवाचा भव्य शुभारंभ सोहळा ठाण्यात पार पडला. यंदा खासदार क्रीडासंग्रामचे दुसरे वर्ष आहे. येत्या १५ ते २३ नोव्हेंबर २०२५ दरम्यान अंबरनाथ, उल्हासनगर, दिवा, कळवा-खारेगाव, डोंबिवली, ठाणे, मुंब्रा येथे हा महोत्सव होणार असून यात १ लाख खेळाडू सहभागी होतील. या शुभारंभ सोहळ्याला खासदार डॉ. शिंदे यांच्यासह खासदार नरेश म्हस्के, युवासेनेचे कार्याध्यक्ष पूर्वेश सरनाईक, ज्येष्ठ बॅडमिंटन प्रशिक्षक श्रीकांत वाड, ठाणे पालिकेच्या (क्रीडा) उपायुक्त मीनल पालांडे आणि विविध क्रीडा संघटनांचे प्रतिनिधी उपस्थित होते. पंतप्रधान नरेंद्र मोदी यांनी या वर्षी खासदारांना ‘सांसद खेल महोत्सव’ आयोजित करण्याचे आवाहन केले. मात्र याची सुरुवात गेल्या वर्षीपासून आपण खासदार क्रीडासंग्रामाच्या माध्यमातून करत आहोत, असे शिंदे याप्रसंगी म्हणाले. मागील वर्षी या महोत्सवात ३० हजारांहून अधिक खेळाडू सहभागी झाले होते. यंदा एक लाख खेळाडू सहभागी होतील, असा विश्वास खासदार डॉ. शिंदे यांनी व्यक्त केला.

Manoj Jarange Patil Maratha Morcha : मराठा आरक्षणाची कोंडी फोडण्यासाठी सरकारचं पहिलं मोठं पाऊल; जरांगे पाटलांशी कोण चर्चा करणार? विखेंनी सांगितलं..
खेळाडूंना शिष्यवृत्ती
खेलो इंडिया, फिट इंडिया मूव्हमेंटसारख्या उपक्रमांमुळे भारतीय खेळाडू आंतरराष्ट्रीय स्तर गाठत आहेत. नवे खेळाडू, नवी ऊर्जा, उत्साह आणि आत्मविश्वास दिसणार आहेत. कल्याण मतदारसंघाला क्रीडाक्षेत्रात नवे स्थान मिळवून देण्याचे सामर्थ्य आहे, असेही शिंदे म्हणाले. स्थानिक खेळाडूंना खासदार क्रीडासंग्रामच्या निमित्ताने मोठ्या मंचावर चमक दाखवण्याची संधी मिळेल. या महोत्सवाची विस्तृत माहिती ९३३८५६७५६७ क्रमांकावर उपलब्ध आहे. या क्रमांकाला मिस्ड कॉल दिल्यास एक लिंक पाठवली जाईल, ज्यात या महोत्सवातील स्पर्धेची माहिती मिळेल. यातील सहभागी खेळाडूंना त्यांच्या सुरक्षेसाठी जीवन विमा देखील काढण्यात येणार आहे. तर त्यांच्या उज्ज्वल भवितव्यासाठी खेळाडूंना शिष्यवृत्ती देखील देण्यात येणार असल्याचे शिंदे यांनी सांगितले.