परस्पर शेअर अन्य कंपनीत वळते करून राष्ट्रवादी काँग्रेस (शप) शहराध्यक्ष दुनेश्वर पेठे यांची तब्बल 23 लाखांनी फसवणूक करण्यात आली आहे. याप्रकरणी नंदनवन पोलिसांनी ठकबाजाविरूद्ध फसवणुकीचा गुन्हा दाखल केला आहे. नंदन ओमप्रकाश गोस्वामी असे गुन्हा दाखल करण्यात आलेल्या ठकबाजाचे नाव आहे. तो मध्यप्रदेशच्या थार जिल्ह्यातील सरदारपूर येथील रहिवासी आहे. पोलिसांकडून प्राप्त माहितीनुसार, नोव्हेंबर २०२४ मध्ये परिचित दिनेश गोस्वामी यांच्या मार्फत पेठे यांची नंदन गोस्वामीसोबत ओळख झाली. नंदन हा माझा मामेभाऊ असून, त्याला शेअर बाजाराचा चांगला अनुभव असल्याचे दिनेशने पेठे यांना सांगितले. त्यानंतर पेठे आणि नंदनमध्ये बोलणे सुरू झाले. ‘माझी आर्थिकस्थिती हलाखीची असून मी बेरोजगार आहे’, असे नंदन त्यांना म्हणाला. दिनेशचा मामेभाऊ असल्याने पेठे यांनी नंदन याला कार्यालयात राहण्यास परवानगी दिली. त्यानंतर नंदन हा पेठे यांच्यासाठी शेअर घेणे आणि विकण्यासह शेअर अकाऊंटचे व्यवस्थापन करायला लागला. त्याला पेठे यांच्या अकाउंटबाबत संपूर्ण माहिती होती. काही दिवसांनी त्याने पेठे यांना एका कंपनीत गुंतवणूक करायला सांगितले. त्यांनी त्या कंपनीत खाते उघडले. ३१ मार्च २०२५ मध्ये पेठे यांनी गुंतवणुकीची संपूर्ण माहिती सीएला द्यायची असल्याचे नंदन याला सांगितले. ‘मी गावाला जात आहे, परत आल्यावर देतो’,असे त्याने सांगून माहिती देण्यास टाळाटाळ करायला सुरूवात केली.नंदन हा महिन्यातून तीन ते चार वेळा गावाला जायला लागला. त्यामुळे पेठे यांना संशय आला. त्यांनी नंदनच्या मोबाईलवर संपर्क साधला. माझ्या वडिलांना घेऊन मी अहमदाबादेतील हॉस्पिटलमध्ये आल्याचे सांगून त्याने मोबाइल बंद केला. दरम्यान पेठे यांनी कार्यालयातील काउंटर बघितले असता त्यातील तीन लाखांची रोख गायब होती. ती नंदन घेऊन गेल्याचे त्यांना कळाले. त्यानंतर शेअर खात्याची तपासणी केली असता नंदन याने परस्पर अन्य खात्यात पेठे यांच्या परवानगीशिवाय 20 लाख रुपयांचे शेअर वळते केले. हे खाते त्याने स्वत:च्या नावे ठेवल्याचे आढळून आले. फसवणूक झाल्याने पेठे यांनी नंदनवन पोलीस ठाण्यात तक्रार दिली. या प्रकरणी पोलिसांनी फसवणुकीसह विविध कलमान्वये गुन्हा दाखल करून तपास सुरू केला आहे.
