गणेशोत्सवात ‘लालबागचा राजा’च्या मंडपामध्ये रोज लाखो भाविकांची गर्दी ओसंडून वाहत असते. दर्शनासाठी येणाऱ्या अतिमहत्त्वाच्या व्यक्तींचीही संख्या मोठी असते. त्यातच ‘ऑपरेशन सिंदूर’नंतर पाकिस्तानच्या गुप्तहेर संघटनांसाठी काम करण्याच्या आरोपाखाली अटक करण्यात आलेल्यांमध्ये यूट्युबर ज्योती मल्होत्राचाही समावेश होता. अधिक धक्कादायक बाब म्हणजे यापूर्वी तिने मुंबईतील अनेक भागांसह ‘लालबागचा राजा’च्या परिसरात होणाऱ्या गर्दीचेही चित्रीकरण केल्याचे समोर आले होते. त्यामुळे यंदाच्या सुरक्षा व्यवस्थेत कोणतीही त्रुटी न ठेवण्याचा निर्धार लालबागचा राजा सार्वजनिक मंडळाने केला आहे. त्यामुळेच पोलिसांच्या सुरक्षा उपाययोजनांसोबतच मंडळाने ‘एआय’सारख्या तंत्रज्ञानाच्या मदतीने सुरक्षा कवच उभे केले आहे.
मंडपात बसवलेल्या यंत्रणेमुळे ‘फेस डिटेक्शन’ आणि ‘आय बॉल डिटेक्शन’ स्वयंचलित पद्धतीने २४ तास सुरू राहणार आहे. संशयास्पद हालचाली किंवा अपवादात्मक वर्तन आढळल्यास त्वरित सुरक्षा यंत्रणेला माहिती पोहोचेल. याशिवाय दोन नवीन तांत्रिक सुविधाही जोडण्यात आल्या आहेत. क्राउड अ ॅनालिसिस सिस्टीममुळे गर्दीची घनता मोजून धोका निर्माण होण्यापूर्वीच अधिकाऱ्यांना सूचना मिळतील. तसेच मोशन ट्रॅकिंग अॅलर्ट प्रणालीमुळे मंडपातील निषिद्ध भागात कोणी शिरण्याचा प्रयत्न केल्यास तत्काळ इशारा दिला जाईल.
‘सुरक्षेबाबत यंदा आम्ही अधिक खबरदारी घेतली आहे. पोलिस आणि आमच्या कार्यकर्त्यांच्या समन्वयासोबतच अत्याधुनिक तंत्रज्ञानामुळे उत्सव मंडळाला सुरक्षेवर योग्य नियंत्रण ठेवणे सोपे होणार आहे. त्यामुळे भाविकही अगदी निर्धास्तपणे ‘लालबागचा राजा’चे दर्शन घेऊ शकणार आहेत’, असे मंडळाचे मानद सचिव सुधीर साळवी यांनी ‘मटा’ला सांगितले.
साडेतीन हजार कार्यकर्त्यांची फौज
सुरक्षा उपाययोजनांसोबतच गर्दीचे नियोजन आणि सुरळीत दर्शनासाठी तब्बल साडेतीन हजार कार्यकर्त्यांची फौज अहोरात्र तैनात असणार आहे. कोणतीही अफवा, गोंधळ, चेंगराचेंगरीसारखी परिस्थिती तत्काळ हाताळण्याचे प्रशिक्षण या कार्यकर्त्यांना देण्यात आले आहे. संपूर्ण परिसरात मोबाइल नेटवर्क बंद झाले तरी एकमेकांशी समन्वय ठेऊन कशी परिस्थिती हाताळायची याचेही नियोजन मंडळाने केले आहे. यंदा ८०० महिला कार्यकर्त्यांचा सक्रिय सहभाग विविध उपाययोजनांमध्ये असणार आहे.