वसिम रौफ खान यांनी कोतवाली या तोडफोडीसंदर्भात पोलीस ठाण्यात तक्रार दिली होती. त्यावरून भारतीय न्याय संहितेच्या कलम 298, 299, 324 (4), 3 (5) अंतर्गत गुन्हा दाखल करण्यात आला आहे. घटनेचे गांभीर्य लक्षात घेऊन जिल्हा पोलीस अधीक्षक सोमनाथ घार्गे यांनी विशेष पथके तयार करण्याचे आदेश दिले आहेत. कोतवाली, तोफखाना पोलीस ठाणे आणि स्थानिक गुन्हे शाखा यांचे संयुक्त पथक प्रकरणाच्या तपासात गुंतले आहेत.

पोलिसांच्या माहितीनुसार, तपासादरम्यान परिसरातील सीसीटीव्ही फुटेज तपासण्यात आले आहेत. ज्यामध्ये तोडफोडीसाठी वापरलेले जेसीबी वाहन सापडले आहे. पोलिसांनी जेसीबी मालक अरुण गोविंद खरात यांची चौकशी केली असता वाहन बबलू पाल या चालकाकडे असल्याची माहिती पोलिसांनी मिळाली. त्यानुसार पोलिसांनी बबलू पाल याला ताब्यात घेतले आहे. प्राथमिक चौकशीत त्याने काही साथीदारांसह ही घटना घडवून आणल्याची कबुली दिली आहे. त्यानंतर त्याचे साथीदार योगेश झोंड, सचिन दारकुंडे, दत्ता गायकवाड यांच्यासह आणखी तीन ते चार जणांना ताब्यात घेण्यात आले आहे.

सदर दोन्ही आरोपींसह जेसीबी मालका अरुण खरातला पुढील तपासासाठी कोतवाली पोलीस ठाण्यात हजर करण्यात आले आहे. या तपासादरम्यान आणखी काही व्यक्तींची नावे समोर आली असून त्यांचा शोध सुरू असल्याची माहिती देखील पोलिसांनी दिली.

ही कारवाई पोलीस अधीक्षक मा. सोमनाथ घार्गे, अपर पोलीस अधीक्षक मा. वैभव कलुबर्मे आणि उपविभागीय पोलीस अधिकारी मा. शिरीष वमने यांच्या मार्गदर्शनाखाली करण्यात आली. या संयुक्त कारवाईत स्थानिक गुन्हे शाखा, कोतवाली आणि तोफखाना पोलीस ठाण्याचे अधिकारी व कर्मचारी सहभागी झाले होते.

दरम्यान, पोलिस प्रशासनाने नागरिकांना आवाहन केले आहे की, ही घटना लक्षात घेऊन कोणीही अफवा पसरवू नये. समाजातील शांतता आणि सौहार्द अबाधित ठेवणे ही सर्वांची जबाबदारी आहे.