मोनो रेल एकाएकी जागेवर थांबली. अर्धा तास झाला तरी जागची हलेना

अतिवृष्टीमुळे प्रवाशांनी मेट्रो व मोनो रेलकडे धाव घेतली. त्याचवेळी हार्बर रेल्वे मार्गिकादेखील मंगळवारी सायंकाळी बंद पडली होती. यामुळेच सायंकाळी चेंबूरहून वडाळा-सात रस्त्याच्या दिशेने निघालेल्या मोनो रेलमध्ये प्रचंड गर्दी झाली. चेंबूरहून सायंकाळी ५.१५ वाजता निघालेली गाडी जवळपास १५ मिनिटांनी ती ‘म्हैसूर कॉलनी’ स्थानकात पोहोचली. त्यावेळी ती प्रचंड भरलेली असल्याने स्थानकावरील सुरक्षा रक्षकांनी स्थानकावरील प्रवाशांना गाडीत चढण्याची मनाई केली. मात्र बाहेर धो-धो पाऊस सुरू होता. त्यात रस्त्यावर वाहतुकीचा गोंधळ, हार्बर रेल्वे बंद, यामुळे प्रवाशांना आपल्या इच्छित स्थळी लवकर पोहोचण्याची घाई होती.
डोळ्यांमध्ये पाणी पण मनामध्ये धैर्य; लोकल खोळंबल्या, मोनोरेल अक्षरश: झुकली, मुंबईच्या स्पिरीटची वेदनादायी कहाणी
या गडबडीत प्रवाशांनी भरलेल्या गाडीत प्रवेश केला. गाडी स्थानकापासून थोडी पुढे जात नाही तोच एकाएकी जागेवर थांबली. अर्धा तास झाला तरीही गाडी जागची हलेना. अखेर प्रवाशांनी घाबरून महापालिका मदत कक्ष, पोलिस, आपत्कालीन हेल्पलाइन यावर कॉल करण्यास सुरुवात झाली. यातून सायंकाळी सहा वाजल्यानंतर अभूतपूर्व बचावकार्य सुरू झाले.
अग्निशामक दल मोनोरेलच्या काचा फोडणार तेवढ्यात प्रवाशांनी…; 3 क्रेन घटनास्थळी, मुंबईत बचावकार्याचा थरार

काचा फोडून प्रवाशांचा बचाव

मोनो रेल मध्यभागी असलेल्या खांबांदरम्यान लोहचुंबक तंत्रज्ञानावर धावत असल्याने गाडीच्या दोन्ही बाजूला मोकळी जागा असते. ही गाडी वळणावर बंद पडली त्यावेळी ती स्थानकापासूनदेखील दूर होती. त्यामुळे प्रवाशांचा बचाव करणे अत्याधिक कठीण काम होते. दोन्ही बाजूला जवळपास १८ मीटरची दरी होती. एमएमआरडीएकडून हे बचावकार्य शक्य नसल्याने महापालिकेची मदत घेण्यात आली. महापालिका प्रशासनाने चार क्रेन आणल्या व त्या गाडीपर्यंत वर नेऊन काचा फोडून प्रवाशांना बाहेर काढावे लागले.

तीनशे प्रवाशांचा बचाव

बचावकार्य सुरू झाल्यावर अंधार पडला व त्यात पाऊसही सुरू झाला. याही स्थितीत महापालिकेच्या कर्मचाऱ्यांनी सुमारे दीड ते दोन तासांत क्रेनच्या साह्याने तीनशेहून अधिक प्रवाशांना सुखरूप बाहेर काढले. मुंबई अग्निशमन दलाने घटनास्थळी धाव घेत तीन स्नोर्केल वाहनांच्या साहाय्याने मदतकार्य सुरू केले. तसेच महापालिका आयुक्त तथा प्रशासक भूषण गगराणी यांच्या सूचनेनुसार प्रवाशांच्या सेवेसाठी ‘बेस्ट’च्या सुमारे चार ते पाच बसदेखील प्रवाशांच्या सोयीसाठी पाठविण्यात आल्या.

बॅटरी बॅक-अप संपला

ही चार डब्यांची गाडी म्हैसूर स्थानकाहून रवाना झाली त्यावेळी तिच्यावरील भार १०४ टनांऐवजी १०९ टन झाला होता. यामुळे गाडीला वीजपुरवठा करणारी यंत्रणा बंद झाल्यानंतर गाडीचा बॅटरी बॅक-अप जवळपास पाऊण तास चालला. त्यानंतर बॅटरीवर दबाव आल्याने सुरुवातीला वातानुकुलित यंत्रणा बंद पडली. त्यानंतर दिवेदेखील बंद झाल्याने प्रवासी गुदमरू लागले.

एमएमआरडीएचे म्हणणे

ही गाडी बंद पडली त्यावेळी दुसरी गाडी पाठवून बंद गाडी ओढून जवळील स्थानकावर नेण्याचा प्रयत्न करण्यात आला. मात्र त्या गाडीची क्षमतादेखील १०४ टनाचीच असताना बंद गाडीत १०९ टन वजन होते. परिणामी तो प्रयत्न निष्फळ ठरला. अखेर महापालिकेने निम्म्या प्रवाशांना बचाव करून गाडीबाहेर काढल्यानंतर गाडी हलकी झाली व त्यानंतर ती ओढत वडाळा स्थानकावर नेण्यात आली व उर्वरित जवळपास २२० प्रवाशांना वडाळा स्थानकावर सुखरूप उतरविण्यात आले. प्रशासनाच्या सूचनांचे प्रवाशांनी पालन करावे, जेणेकरून अशा घटना टाळता येतील, असे आवाहन एमएमआरडीएने केले. या घटनेनंतर घामाने डबडबलेले आणि तणावात असलेल्या प्रवाशांचा व्हिडीओ सामाजिक माध्यमांवर व्हायरल झाला.
मोनोरेल बंद का पडली? MMRDA कडून मोठा खुलासा, नेमकं कारण काय?

मुख्यमंत्र्यांकडून चौकशीचे आदेश

एमएमआरडीए, अग्निशमन दल आणि महापालिका अशा सर्वच यंत्रणांनी प्रवाशांच्या सुरक्षिततेला सर्वोच्च प्राधान्य देत बचावकार्य केले. हा प्रकार का घडला, याचीही चौकशी करण्यात येईल, असे मुख्यमंत्री देवेंद्र फडणवीस यांनी सांगितले.

दोन प्रवाशांना अधिक त्रास

दोनशेपैकी दोघांना घुसमटसारखे वाटल्याने केईएम रुग्णालयात दाखल करण्यात आले. त्यात २३ वर्षीय अमन सिंग आणि २७ वर्षांच्या ऐश्वर्या पवार यांचा समावेश आहे.