बीडीडी चाळ पुनर्विकास प्रकल्पाअंतर्गत म्हाडाकडून पहिल्या टप्प्यात अर्थात फेज १ मध्ये ५५६ रहिवाशांना आज चावीवाटप करण्यात आलं आहे. येथील रहिवाशांना ५०० चौरस फुटांची अत्याधुनिक घरं मिळणार आहेत. बीडीडीधारकांचं ५०० चौरस फूट, 2 बीएचके घरांमध्ये राहायला जाण्याचं स्वप्न पूर्ण होणार आहे.

बीडीडी चाळ पुनर्विकास प्रकल्पात एकूण १२१ चाळींचा पुनर्विकास होत आहे. या प्रकल्पात ४० मजल्यांच्या अशा ३३ इमारती बांधल्या जाणार आहेत. या इमारती, टॉवर भूकंपरोधक पद्धतीने बांधण्यात आल्या आहेत. ४० मजली टॉवरसमोरुन निळाशार समुद्राचं दृश्य पाहायला मिळणार आहे.

वरळीतील हा मतदारसंघ आदित्य ठाकरेंचा आहे. महाविकास आघाडीचं सरकार असताना वरळीतील या बीडीडी चाळ पुनर्विकासासाठी कामं होताना पाहायला मिळाली होती. आता जवळपास अडीच वर्षांनी पहिल्या टप्प्यातील, पहिल्या फेजधील घरं आता उपलब्ध होत आहेत. मात्र स्थानिक आमदार आदित्य ठाकरे या सोहळ्यासाठी उपस्थित नव्हते. भाषणाच्या यादीत त्यांचं नाव नसल्याने नाराजी असल्याची माहिती आहे.