ब्रिटीशकालीन १३० वर्षे जुना बेलासिस पूल पाडून त्याची पुनबांधणी केली जात आहे. मुंबई सेंट्रल स्थानकानजीक रेल्वेमार्गावर केबलआधारित पूल उभारण्यासाठी मुंबई महापालिका, एमएमआरडीए यांनी ‘महारेल’शी करार केला आहे. बेलासिस पूल प्रकल्प पूर्णत्वाचा कालावधी एप्रिल २०२६ पर्यंत आहे.
काटई नाका ते मुंब्रा विशेष उन्नत मार्ग, दीड तासांचा प्रवास १५ मिनिटांवर येणार; ६ किमीचा मार्ग खाडी पार करुन जाणार
मात्र या पुलाचे बांधकाम नियोजित कालावधीपूर्वी पूर्ण करून डिसेंबर २०२५ अखेरपर्यंत वाहतुकीस खुला करण्यासाठी प्रयत्नशील राहावे, असे निर्देश अतिरिक्त महापालिका आयुक्त (प्रकल्प) अभिजीत बांगर यांनी दिले आहेत. पुलाचे रेल्वेहद्दीतील काम पश्चिम रेल्वे करत असून पुलाच्या पोहोच रस्त्यांची बांधणी मुंबई महापालिका करत आहे.

पूल उभारणीच्या अनुषंगाने मातीपरीक्षण, पायाबांधणी, खांबांचे बांधकाम पूर्ण झाले आहे. पुलाला अडथळा ठरणारी बांधकामे हटविण्यात आली आहेत. पूर्व बाजूला पोहोच रस्त्यासाठी महापालिकेच्या वतीने ४० गर्डर स्थापित करावे लागणार आहेत. त्यापैकी चार गर्डर बसवण्यात आले आहेत, रेल्वे हद्दीतील काम पश्चिम रेल्वे करत असून रेल्वे कंत्राटदाराने ३६ मीटर स्पॅनचे एकूण १२ गर्डर स्थापित करण्याची कार्यवाही पूर्ण केली आहे. गर्डर येणे, त्यांची जुळवाजुळव आणि स्थापित करणे आदी कामे १० ऑगस्ट २०२५ पर्यंत पूर्ण होणे अपेक्षित होते. त्यानुसार, गर्डर स्थापित करण्याची कार्यवाही पूर्ण झाली आहे.
ऐन गणेशोत्सवात वाहतुकीचे तीनतेरा, मेट्रो गर्डरसाठी वाहतुकीत बदल; कल्याण शिळ मार्गावर ‘या’ ठिकाणी प्रवेशबंदी

नियोजित वेळेआधीच पूर्तता

आता पश्चिम दिशेच्या पोहोच मार्गातील राहिलेल्या एका खांबाचे काम सुरू करण्यात येणार आहे. १४ सप्टेंबर २०२५ पर्यंत गर्डरचे मजबुतीकरण, पुलाच्या प्रवास पृष्ठभागाची रचना करणे, स्लॅब कास्टिंग इत्यादी कामे पूर्ण करण्याचे नियोजन आहे. त्यानंतर दोन्ही पोहोच मार्गांची कामे हाती घेऊन ३१ डिसेंबर २०२५ पर्यंत पुलाचे संपूर्ण काम पूर्ण होईल, अशी माहिती बांगर यांनी दिली.