मिळालेल्या माहितीनुसार, श्रावण सोमवारनिमित्त सेलू येथून पाथरी तालुक्यातील रत्नेश्वर रामपुरी येथे 250 कावड यात्रेकरू आले होते. मध्यरात्री रामपुरी येथे थांबून पहाटे कावड यात्रेकरू परतीच्या प्रवासाला निघाले. पाथरी शहराबाहेर आल्यानंतर सेलूकडे मार्गक्रमण करत असताना खेडूळा पाटीजवळ पहाटेच्या सुमारास एम. एच. 03 सी. एच. 1211 या क्रमांकाची कार थेट यात्रेत घुसली. हा अपघात एवढा भीषण होता की, या धडकेत ऋषिकेश अशोक शिंदे (रा. सेलू, वय 16 वर्षे) आणि एकनाथ गंगाधरराव गजमल (रा. डासाळा, ता. सेलू वय 50 वर्षे) हे जागीच ठार झाले. तर प्रभू तेवर, कृष्णा केशव भोसले, धनराज शाम खेडकर व कृष्णा डोळझापे हे गंभीर जखमी झाले.

Parbhani News: चार महिन्यातच सारी स्वप्न तुटली… सासरी सततचे टोमणे अन् अतोनात छळ, नवविवाहितेने आयुष्य संपवलं

जखमींना तातडीने रुग्णालयात हलवण्यात आले असून त्यांच्यावर सेलू येथील रुग्णालयात उपचार सुरू आहेत. अपघाताची माहिती मिळताच पाथरी पोलिस ठाण्याचे स. पो. नि. सोमनाथ नरके, जैस्वाल, थोरे आणि इतर कर्मचारी साडेपाच वाजण्याच्या सुमारास घटनास्थळी पोहोचले. याप्रकरणी मयत एकनाथ गंगाधर गजमल यांचे बंधू भुजंग गंगाधर गजमल यांनी पाथरी पोलिसात दिलेल्या फिर्यादीवरून कारचा चालक असलेल्या गजानन खंडागळे याच्याविरुद्ध पाथरी पोलीस ठाण्यात गुन्हा दाखल करण्यात आला असून पोलीस पुढील तपास करत आहेत.

दरम्यान, श्रावण महिन्यानिमित्त अखंड हिंदू राष्ट्र समितीच्या वतीने या कावड यात्रेचे आयोजन करण्यात आले होते. यात सेलू तालुक्यातील युवक मोठ्या प्रमाणावर उपस्थित होते. पाथरीमध्ये झालेल्या या अपघातात दोन भाविकांचा मृत्यू झाल्याची बातमी समजताच संपूर्ण सेलू शहर व डासाळा गावावर शोककळा पसरली आहे.