आदित्य ठाकरे यांचा वरळी हा मतदारसंघ आहे. सहा महिन्यांपूर्वी पार पडलेल्या विधानसभा निवडणुकीत आदित्य ठाकरे या मतदारसंघातून निवडून आले. पण अतिशय अटीतटीच्या लढतीत त्यांचा विजय झाला. त्याआधी ते वरळीतून बिनविरोध निवडून आले होते. पण शिवसेना फुटीनंतर पार पडलेल्या विधानसभा निवडणुकीत त्यांना शिंदे गटाचा प्रतिकार करावा लागला.

शिंदे-आदित्य ठाकरे एकाचवेळी कोळीवाड्यात

आदित्य ठाकरे यांना बॅकफूटला टाकण्यासाठी एकनाथ शिंदे यांच्याकडून सर्वोतोपरी प्रयत्न केला जातो. ते आजदेखील बघायला मिळालं. आदित्य ठाकरे दरवर्षी वरळी कोळीवाड्यात नारळी पौर्णिमेला जातात. तिथल्या कोळीबांधवांसोबत नृत्य देखील करतात. समुद्राला नारळ अर्पण करतात. पण यावेळी आदित्य ठाकरे कोळीवाड्यात पोहोचण्याआधीच एकनाथ शिंदे तिथे दाखल झाले. त्यामुळे अनेकांच्या भुवया उंचावल्या आहेत.

आगामी काळात मुंबई महापालिकेच्या निवडणुका आहेत. त्यामुळे प्रत्येक पक्ष कामाला लागले आहेत. नेतेमंडळी आता निवडणुकीच्या पार्श्वभूमीवर स्थानिक पातळीवर सर्वसामान्य नागरिकांपर्यंत पोहोचण्याचा प्रयत्न करत आहेत. त्याचाच एक भाग म्हणून एकनाथ शिंदे स्वत: वरळी कोळीवाड्यात दाखल झाले असावेत. पण त्यानंतर लगेच आदित्य ठाकरे हे सुद्धा दाखल झाले.

दोन्ही गटाची घोषणाबाजी अन्…

आदित्य ठाकरे आणि एकनाथ शिंदे एकाचवेळी वरळी कोळीवाड्यात असल्याने दोन्ही गटाच्या कार्यकर्त्यांमध्ये संघर्ष होण्याची भीती होती. यावेळी गर्दी देखील मोठ्या प्रमाणात होती. त्यामुळे पोलिसांसमोर मोठं आव्हान होतं. एकनाथ शिंदे वरळी कोळीवाड्याला भेट देवून परतत होते तर आदित्य ठाकरे आतमध्ये शिरत होते. यावेळी दोन्ही नेते आमनेसामने आले. यावेळी दोन्ही गटाच्या कार्यकर्त्यांनी घोषणाबाजी केली. त्यामुळे वातावरणात तणाव निर्माण झाला. पण पोलिसांनी मध्यस्थी केली. त्यामुळे मोठा वाद टळला. या घटनेची आता सर्वत्र चर्चा होत आहे.