खराडीतील ही रेव्ह पार्टी ‘हाउस पार्टी’च्या नावाखाली सुरु होती. रॅडीसन हॉटेलच्या मागे असलेल्या एका इमारतीतील गेस्ट हाऊसमध्ये हा प्रकार सुरू होता. बनसोडे नावाच्या व्यक्तीच्या मालकीच्या सदनिका हा प्रकार घडत होता. पुणे पोलिसांच्या गुन्हे शाखेने रात्री उशिरा छापेमारी करत अमली पदार्थ, हुक्का आणि विदेशी दारू जप्त केली.

पोलिसांनी मिळवलेल्या माहितीवरून हे अड्डे काही दिवसांपासून रात्रीच्या वेळी सक्रिय असल्याचे स्पष्ट झाले. पार्टीतील पाच ते सात जणांविरोधात अमली पदार्थ प्रतिबंधक कायदा आणि अन्य कलमांनुसार गुन्हा दाखल करण्यात आला आहे. पुढील तपास पुणे पोलिस करत असून, रेव्ह पार्टी आयोजित करणाऱ्यांची चौकशी सुरू आहे. या कारवाईने खराडी परिसरात सुरू असलेल्या अशा गुप्त पार्ट्यांवर नियंत्रण येण्याची शक्यता आहे.

या प्रकरणात काही मोठी नावे समोर येत आहेत. एकनाथ खडसे यांचे जावई प्रांजल खेवलकर यांच्यासह एक कुख्यात बुकी यात सहभागी असल्याचे समोर आले आहे.

दरम्यान, पोलिसांच्या या कारवाईमुळे शहरात खळबळ उडाली आहे. पुणे शहरात मागील काही वर्षांपासून गैरप्रकारांमध्ये मोठ्या प्रमाणात वाढ झाली आहे. राष्ट्रवादीच्या तत्कालीन आमदाराच्या मुलाने मद्यधुंद अवस्थेत तरुण-तरुणीला चिरडल्याच्या घटनेमुळे शहरातील कायदा-सुव्यवस्थेचा प्रश्न चर्चेत आला होता. या पार्श्वभूमीवर पोलिसांकडून कठोर कारवाई केली जात असून रेव्ह पार्टी उधळण्यात आली आहे.