Jitendra Awhad Reacted On Vidhan Bhawan Scuffle : राष्ट्रवादी काँग्रेस शपचे आमदार जितेंद्र आव्हाड आणि आमदार गोपीचंद पडळकर यांच्यातील वादाला आता गंभीर वळण लागले आहे. आज विधानभवनात आव्हाड आणि समर्थक थेट भिडले. या प्रकारावर आता जितेंद्र आव्हाड यांनी संतप्त प्रतिक्रिया दिली आहे.
विधानभवन परिसरात माध्यमांशी संवाद साधताना जितेंद्र आव्हाड संतप्त सुरात आव्हाड म्हणाले, ‘हल्ला कोणी केला… बोला ना पडळकरांनी केला, कशाला प्रश्न विचारताय? अख्ख्या महाराष्ट्राला समजलं हल्ला कोणी केला. तुम्ही विधानभवनात गुंडांना प्रवेश देणार असाल, तर आमचे जीव सुरक्षित नाही आहेत. आई बहिणीवरुन शिव्या दिल्या. मारून टाकण्याची धमकी दिली.’
Monsoon Session: आव्हाड-पडळकर समर्थक भिडले, विधानभवनाच्या पायऱ्यांवर धक्काबुक्की, हाणामारी अन् शिवीगाळ
आव्हाड पुढे म्हणाले, मी भाषण झाल्यावर मोकळी हवा घेण्यासाठी बाहेर आलो होतो, हे मलाच मारण्यासाठी आले होते. विधीमंडळाच्या पायऱ्यांवर आणि भवनामध्ये आमदार सुरक्षित नसतील तर कशाला राहायचं आमदार? काय गुन्हा आहे आमचा? असा संतप्त सवाल आव्हाडांनी उपस्थित केला.
विधानभवन परिसरात शिव्या दिल्या जातात, असंसदीय शब्द वापरले जातात, आता करुन टाका शिव्यांना पण संसदीय शब्द. सत्तेचा एवढा माज का… असे म्हणत जितेंद्र आव्हाड कडाडले.
दरम्यान, गोपीचंद पडळकर यांनी धर्मांतरणाच्या मुद्द्यावरुन वादग्रस्त वक्तव्य केले होते. त्यावरुन जितेंद्र आव्हाडांनी पडखळकरांना विधानसभेतील चर्चेदरम्यान घेरले होते. त्यावरुन त्यांच्यातील वादाला फोडणी मिळाली. बुधवारच्या सत्रादरम्यान विधानभवनाच्या गेटवर आव्हाड आणि पडळकर यांच्यात बाचाबाची झाली. त्यानंतर आज आव्हाड-पडळकर समर्थक भिडले. त्यामुळे विधानभवनाच्या लॉबीमधील वातावरण तापले होते.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा