वृत्तानुसार, बुधवार सकाळच्या सुमारास हा भीषण अपघात घडला. यामध्ये साहिल अंसारी मुलाणी (वय २२, रा. नागठाणे) या महाविद्यालयीन तरुणाचा दुर्दैवी मृत्यू झाला. तर त्याचा मित्र प्रतिक अनिल साळुंखे (वय १९, रा. बुरूड गल्ली, इस्लामपूर) हा गंभीर जखमी झाला आहे. अपघाताची माहिती मिळताच शहर पोलिसांनी घटनास्थळी धाव घेतली. नागरिकांनी जखमी प्रतिक याला तातडीने शासकीय रुग्णालयात दाखल केले. त्याची प्रकृती गंभीर असल्याने त्याला खासगी रुग्णालयात हलविण्यात आले आहे. घटनास्थळी नागरिकांनी मोठी गर्दी केली होती.
ट्यूशनमधून मुलगी बाहेर पडली, समोर सॅन्ट्रो कार, चार जण उतरले, अपहरणाचा डाव अन्…
पोलिसांच्या माहितीनुसार, मृत साहिल मुलाणी हा आई व वडिलांसह पलूस तालुक्यातील नागठाणे येथे राहत होता. तो इस्लामपूर येथील यशवंतराव चव्हाण महाविद्यालयात बी कॉमला शिकत होता. जखमी प्रतिक हा साहिलचा मित्र आहे. दोघेही एकाच महाविद्यालयात शिकत होते. मंगळवारी सकाळी प्रतिक याची स्टेनोची परिक्षा सांगलीतील विल्डिंगन महाविद्यालयात होती. त्यासाठी साहिल सकाळी नागठाणे येथून दुचाकी घेऊन घरातून बाहेर पडला. त्याने वाळवा येथे दुचाकी पार्क केली आणि बसने इस्लामपूरला आला. प्रतिक याच्याकडे वाहन चालविण्याचा परवाना नसल्याने साहिलने त्याची मोपेड दुचाकी (एमएच १०, ईडी ४६९९) घेतली. दोघेजण परिक्षेसाठी इस्लामपूरहून सांगलीकडे येत होते.

सकाळी सव्वा आठ वाजता दोघेजण दुचाकीवरून सांगलीवाडी टोलनाक्याजवळ आले. याचवेळी बायपास रस्त्यावरून शिवशाही बस (एमएच ०९, ईएम १४७९) सांगलीहून पुण्याकडे निघाली होती. टोलनाक्याच्या पुढे मुख्य चौकात शिवशाही बस रास्ता ओलांडताना दुचाकी आणि बसची समोरासमोर जोराची धडक बसली. बसच्या डाव्या बाजूला धडक बसल्याने दोघेही युवक रस्त्यावर पडले. यात साहिलच्या डोक्याला गंभीर दुखापत झाली आहे. रस्त्यावर रक्ताचा सडा पडला होता. तो जागीच ठार झाला होता. तर दुचाकीवर पाठीमागे बसलेला मित्र प्रतिक हा जखमी झाला. त्याला तातडीने उपचारासाठी शासकीय रुग्णालयात हलविण्यात आले. पोलिसांनी पंचनामा करून बसचालकाविरोधात गुन्हा दाखल केला आहे.