पोलिसांच्या माहितीनुसार, माजलगाव तालुक्यातील किट्टीआडगाव येथील रहिवासी असलेले सेवानिवृत्त पोलीस अधिकारी राजाराम सिरसट यांच्याकडे शेतात काम करण्यासाठी असणारा सालगडी विश्वनाथ पंडितकडे ऊसतोड मुकादमाचे देणे होते. मुकादम शेख राजू शेख बाबू रा. मंजरथ ता. माजलगाव जि.बीड याचे बाराशे रुपये थकले होते. या बाराशे रुपयांसाठी या मुकादमाने व त्याच्या साथीदारांनी विश्वनाथ यांचे काल सकाळी दहा वाजताच्या दरम्यान अपहरण केले. त्यानंतर त्याला मारहाण करायला सुरुवात केली. त्याने स्वतःचा बचाव करण्यासाठी शेत मालक सेवानिवृत्त पोलीस अधिकारी राजाराम सिरसट यांना फोन करून मारहाण होत असल्याची माहिती दिली.
Thane Crime : घोडबंदरमध्ये निर्जनस्थळी बॉडी, अल्पवयीन मुलीला संपवणारा 40 वर्षीय रिक्षाचालक अटकेत, कारण काय?
माहिती मिळताच राजाराम सिरसट यांनी संबंधित मुकादमाकडे फोनवरून सालगड्याकडील पैशासंदर्भात विचारले असता मुकादमाने विश्वनाथकडे दीड लाख रुपये आहेत. दीड लाख रुपये द्या आणि सालगड्याला घेऊन जा, असे सांगितले.

राजाराम सिरसट यांनी घरी जाऊन दीड लाख रुपये घेतले व मुकादमाने सांगितलेल्या ठिकाणी गेले. यावेळी सालगड्याने दीड लाख रुपये देऊ नका असे सांगितले. त्यामुळे मुकादम शेख राजू शेख बाबू आणि त्याच्या साथीदारांनी सालगड्यासह शेतमालक सिरसट यांना शिवीगाळ करून मारहाण करण्यास सुरुवात केली. गंभीर जखमी अवस्थेत राजाराम सिरसट यांना जबरदस्ती मोटरसायकलवर बसवून माजलगाव तालुक्यातील ढोरगाव आणि लवूळ शिवारातील घनदाट असलेल्या जंगलात घेऊन जाऊन पुन्हा मुकादम व त्यांच्या साथीदाराने मारहाण करायला सुरुवात केली. यावेळी लाठ्या-काठ्या, कुऱ्हाड आणि गुप्ती अशा धारदार शस्त्रांनी मारहाण करायला सुरुवात केली, असे सांगण्यात येत आहे. तसेच जवळील रिव्हॉल्व्हरचा धाक दाखवत देखील अमानुष मारहाण केली. यातच पैसे घेऊन पलायन करण्याच्या तयारीत असताना सिरसट यांच्या घरच्यांनी त्यांना शोधून काढले व पळून जात असलेल्या मुकदमास ताब्यात घेत माजलगाव ग्रामीण पोलिसांच्या ताब्यात देण्यात आले.

सेवानिवृत्त पोलीस अधिकारी राजाराम सिरसट यांनी मारहाण करणाऱ्या मुकादम आणि त्याच्या साथीदाराच्या विरोधात तक्रार दिली असून आता या प्रकरणात माजलगाव ग्रामीण पोलीस स्टेशन मध्ये गुन्हा दाखल करण्याची प्रक्रिया सुरू आहे. या मारहाणीत राजाराम सिरसट हे गंभीर जखमी झाले असून त्यांच्यावर बीड येथील जिल्हा रुग्णालय उपचार सुरू आहेत. किरकोळ पैशासाठी मुकादम आणि त्याच्या साथीदारांकडून सेवानिवृत्त पोलीस अधिकाऱ्यांना अमानुष आणि गंभीर मारहाण झाल्याने एकच खळबळ उडाली आहे.