समीर भुजबळ म्हणाले, मराठा समाजाचा सरसकट समावेश ओबीसींमध्ये करण्यास अखिल भारतीय महात्मा फुले समता परिषदेचा विरोधच आहे. मुंबईत आयोजित करण्यात आलेल्या मराठा मोर्चांसंबंधी भूमिका काय आहे, हे मंत्री छगन भुजबळच जाहीर करतील. ओबीसींमध्ये साडेचारशेवर जाती असून, त्यांच्यासाठी फक्त 27 टक्के आरक्षण आहे. त्यापैकीही केवळ 19 टक्के खर्‍या ओबीसींना त्याचा लाभ मिळतो. त्यामुळे ओबीसींची संघटनात्मक बांधणी परिषदेने प्राधान्याने हाती घेतली आहे व आगामी जात जनगणनेत प्रत्येक ओबीसीने आपली योग्य नोंद होण्याच्यादृष्टीने जागरूक राहण्याच्या सूचनाही देण्यात आल्या आहेत.

‘कितीही मोठ्या बापाचा असूदे, टायरमध्ये घेऊन झोडायला सांगणार’; अजित दादांनी कुणाला भरला दम?

जरांगे पाटलांचे मराठा मोर्चे व आंदोलनाचे थेट नाव न घेता कार्याध्यक्ष समीर भुजबळ यांनी त्यांच्यावर अप्रत्यक्ष टीका केली. ते म्हणाले, मध्यंतरी ओबीसी आरक्षण धोक्यात आले होते. त्यावेळी ना. छगन भुजबळ यांनी मंत्रीपदाचा राजीनामा देऊन लढा उभारला. त्यामुळे आरक्षणावर आलेली गदा थोपवली गेली. आता पुन्हा त्याच प्रकारची भूमिका घेतली जात असल्याने त्याविरोधात ओबीसींचे मजबूत संघटन उभे करण्यासाठी संघटनात्मक बैठका घेतल्या जात आहेत. पदाधिकारी बदल, नवी पद निर्मिती, ओबीसीतील सर्व समाज घटकांना परिषदेत पदाधिकारी म्हणून स्थान या अनुषंगाने फेररचना सुरू आहे, असे स्पष्ट करून समीर म्हणाले, जरांगे पाटील 29 ऑगस्टला पुन्हा मोर्चा काढणार असल्याचे बोलले जात असले तरी लोकशाहीत प्रत्येकाची मर्जी असते. त्यांनी काय भूमिका मांडायची हा त्यांचा विषय आहे. त्यांची भूमिका जाहीर झाल्यावर आम्ही आमची भूमिका मांडू, असेही त्यांनी सांगितले.

दरम्यान, या बैठकीला संयोजक डॉ. नागेश गवळी, माजी आमदार पांडुरंग अभंग, बापूसाहेब भुजबळ, नगरमधील भाजपचे माजी शहर जिल्हाध्यक्ष अ‍ॅड. अभय आगरकर, माजी महापौर भगवान फुलसौंदर, माजी नगरसेवक बाळासाहेब बोराटे, दत्ता जाधव, अंबादास गारुडकर, संजय गारुडकर आदींसह घनश्याम शेलार, अनिल निकम, सुभाष लोंढे, भारत गारुडकर, किशोर जेजुरकर, अमित खामकर, विशाल वालकर, ब्रिजेश ताठे, दीपक खेडकर, अभिषेक चिपाडे, प्रकाश इवले, अ‍ॅड. सुभाष राऊत, प्रा. सत्संग मुंडे, समाधान जेजुरकर व जिल्हाभरातील कार्यकर्ते उपस्थित होते.