मी पोलिसांचा मुलगा नसलो तरी पोलिसांशी माझा कायम संपर्क आला आहे. कारण माझे काका पोलीस उपनिरीक्षक होते. त्यांच्याकडेच शिक्षणानिमित्ताने राहायचो. पोलिसाचीच मुलगी माझी बायको आहे तर साला माझा पोलीस आहे, अशा पद्धतीने पोलिसांचं आमचं साटंलोटं आहे, असा दावा गुलाबराव पाटील यांनी केला.

राजकारणामध्ये सुद्धा पोलिसांची मला फार मोठी मदत झाली. त्यामुळे आज मी या पदावर जाऊन पोहोचलो आणि याच पोलिसांसाठी मी काम करू शकतो. यासाठी मी स्वतःला भाग्यशाली समजतो, असं गुलाबराव पाटील म्हणाले. माझी गाडी कुठलीही असो पण गाडीवर महाराष्ट्र शासन लिहिलं आहे आणि तोच मोठा रुबाब आहे. त्यामुळे मर्सिडीज गेली तरी तिला थांबवले जाते, ती सुटत नाही. मात्र आपली गाडी गेली की ती लगेच सुटते, असं गुलाबराव पाटील म्हणाले.

रामानंद पोलीस स्टेशनच्या उद्घाटनासाठी पोलीस अधीक्षकांनी चांगला दिवस निवडला. जेव्हा जेव्हा आषाढी एकादशी येईल तेव्हा तेव्हा आठवण राहील की रामानंदनगर पोलीस स्टेशनचे उद्घाटन केलं. सर्वांनी पोलीस स्टेशन पाहा. मात्र या ठिकाणी कधी येऊ नका, असं मिश्किल वक्तव्य सुद्धा यावेळी मंत्री गुलाबराव पाटील यांनी भाषणात केलं. रामानंद पोलीस ठाण्याचं लोकार्पण मंत्री गुलाबराव पाटील यांच्या हस्ते करण्यात आला. या कार्यक्रमात भाषणात मंत्री गुलाबराव पाटील यांनी जुन्या आठवणींना उजाळा देत फटकेबाजी केली.