या ‘एसआयटी’मध्ये वरिष्ठ पोलिस अधिकाऱ्यांसह सनदी अधिकाऱ्यांचाही समावेश करण्यात येईल, अशी माहिती भुसे यांनी दिली. येत्या तीन-चार महिन्यांत ‘एसआयटी’ला अहवाल देण्याची सूचना करण्यात येईल, त्यानंतर दोषींवर कठोर कारवाई करण्याची घोषणा भुसे यांनी यावेळी विधानसभेत केली. नागपूर जिल्ह्यातील एक हजारहून अधिक शिक्षक आणि शिक्षकेत्तर कर्मचाऱ्यांची नावे यादीत समावेश करून कोट्यवधी रुपयांच्या गैरव्यवहारप्रकरणी आमदार प्रवीण दटके यांनी मंगळवारी विधानसभेत लक्षवेधी सूचना मांडली. यावेळी आमदार प्रशांत बंब, मुफ्ती मोहम्मद खालिक यांच्यासह अनेक आमदारांनी या चर्चेत सहभाग घेतला. या प्रकरणी दोषी असलेल्या शिक्षण विभागातील अधिकाऱ्यांवर कारवाईची मागणी त्यांनी केली. दरम्यान, यावेळी आमदार मुफ्ती खालिक यांनी नाशिक विभागातील शिक्षण विभागांतील अधिकाऱ्यांची यादी जाहीर करताना हे अधिकारी वर्षांनुवर्षे त्याच जागेवर काम करीत आहेत, याकडे सभागृहाचे लक्ष वेधले.
विधानभवनात राडा, Nana Patole निलंबित : अध्यक्षांच्या दिशेने धावले नाना, मुख्यमंत्री भडकले
यावेळी उत्तर देताना शालेय शिक्षणमंत्री दादा भुसे म्हणाले की, ‘याप्रकरणी राज्यव्यापी एसआयटी स्थापन करण्यात येणार आहे. पोलिस अधिकारी आणि शिक्षण क्षेत्रातील वरिष्ठ अधिकाऱ्यांची समांतर ‘एसआयटी’ असणार आहे. याप्रकरणात कोणाचीही हयगय केली जाणार नाही, दोषींवर कठोर कारवाई केली जाईल. याप्रकरणी कोणताही संस्थाचालक असेल तरी त्यांच्यावरही कारवाई केली जाईल.’

‘दोषींकडूनच निधीवसुली’

‘नागपूर प्रकरणात तपास सुरू आहे. या प्रकरणात आत्तापर्यंत १९ जणांविरोधात फौजदारी कारवाई झालेली आहे. शालेय शिक्षण विभागाच्या माध्यमातून एक समिती स्थापन करण्यात आली असून, या चौकशीत जे कोणी दोषी आढळून येईल, त्यावर कारवाई करण्यात येईल’, अशी माहिती भुसे सभागृहात दिली. दोषींकडून शासकीय निधीचा अपहार झाल्याचे समोर आले असून, या निधीची वसुली दोषींकडून करण्याबाबत चौकशीअंती निर्णय घेतला जाईल, असे भुसे म्हणाले.