पुणे जिल्हाधिकारी कार्यालयात शनिवारी आदिवासी विभागाची आढावा बैठक पार पडली. या बैठकीनंतर झालेल्या पत्रकार परिषदेत मंत्री अशोक वुईके बोलत होते. त्यावेळी आमदार बापू पठारे देखील उपस्थित होते. अशोक वुईके यांनी हिंदी भाषेबद्दल आपले विचार स्पष्टपणे मांडले. “माझा जन्म आदिवासी कुटुंबात झाला आहे. माझी आई निरक्षर होती; पण तिने माझ्यावर मराठीचे संस्कार केले. मला तीच भाषा येते. मला हिंदी येत नाही. हिंदी माध्यमांशी मी हिंदीत बोलणार नाही,” असं उईके यांनी म्हटलं.

दरम्यान, अशोक वुईके यांच्या वक्तव्यामुळे राजकीय वातावरण पुन्हा एकदा तापणार आहे. कारण विरोधी पक्षांनी हिंदी सक्तीच्या मुद्द्यावरून सत्ताधारी पक्षाला धारेवर धरले आहे. अशातच महायुती सरकारमधील मंत्र्‍यानेही घरचा आहेर दिल्याने मुख्यमंत्र्‍यांसह सरकारची कोंडी होण्याची शक्यता आहे.

हिंदी सक्तीवरून आरोप-प्रत्यारोप

भाजपने उद्धव ठाकरे मुख्यमंत्री असताना राज्यात राष्ट्रीय शैक्षणिक धोरण लागू केल्याचा आरोप केला होता. या आरोपाला उत्तर देताना ठाकरे गटाचे खासदार संजय राऊत यांनी तत्कालीन मंत्रिमंडळ बैठकीतील माहिती जाहीर करून भाजपवर पलटवार केला. केंद्राकडून भाषिक धोरणाचा दबाव असताना उद्धव ठाकरेंनी समिती नेमून अहवाल मागवला, पण अंमलबजावणीसाठी आदेश काढला नाही, असं राऊत यांनी स्पष्ट केलं.