बोरीवली नाव कसे पडले?
बोरीवलीचे नाव एका फळाच्या नावाने पडल्याचे बोलले जाते. असे सांगितले जाते की, मुंबईच्या उत्तरेला वनांचा मोठा परिसर होता . त्या वनांच्या परिसरात मोठ्या प्रमाणात बोरांची झाडे होती. बोरांच्या झाडांमुळे त्या परिसराला बोरीवली असे म्हटले गेले. आणि त्यावरुनच रेल्वे स्थानकाचेही नाव बोरीवली असे देण्यात आले.

बोरीवलीतील प्रमुख ठिकाणे
बोरीवलीत संजय गांधी राष्ट्रीय उद्यान आहे. याच भागात असून कान्हेरी लेण्या आहेत. बोरीवलीत गणेशभक्तांचे श्रद्धास्थान असलेला वझिरा गणपती आहे. गोराई समुद्र किनारा,पॅगोडा, अशी असंख्य पर्यटन स्थळे बोरीवलीत आहेत. पूर्वी जंगलं असणाऱ्या परिसरात आता मोठ्या प्रमाणात इमारती उभ्या राहिल्या आहेत. अनेक जुन्या इमारतींचा मोठ्या प्रमाणात पुनर्विकास होताना पाहायला मिळत आहे. शहरातील रंगंभूमीचे महत्त्वाचे केंद्र असलेले प्रबोधनकार ठाकरे नाट्यगृह बोरीवली पश्चिमेला आहे.

देशातील पहिले दृष्टीहीन सुगम स्थानक
बोरीवली स्थानक हे भारतातील पहिले दृष्टीहीन सुगम स्थानक आहे. 2018 साली बोरीवली स्थानकाला हा मान मिळाला. दृष्टीहीनांसाठी ब्रेल लिपी चिन्हीत फुटओवर ब्रिजचे रेलिंग, प्रवेशद्वार, सबवे रेलिंग अशा अनेक सुविधा दिल्या गेल्या आहेत. गोरेगावपर्यंत आलेल्या हार्बर रेल्वेला बोरीवलीपर्यंत वाढवण्याचे काम रेल्वे विभागाद्वारे केले जात आहे. बोरीवलीवरुन थेट पनवेल आणि छत्रपती शिवाजी महाराज टर्मिनलला जाणे शक्य होणार आहे.