Dispute in BJP : भाजपातील दोन नेत्यांमधील वाद आता टोकाला पोहोचला आहे. विशेष म्हणजे भाजप खासदार मेधा कुलकर्णी यांना चक्क भाजप नेत्याच्या भावाकडून धमकीचा फोन आल्याचा दावा करण्यात आलेला आहे. त्यामुळे भाजपमधील अंतर्गत कलह उफाळून आलेला बघायला मिळत आहे.
पुण्यात मेधा कुलकर्णी आणि शेखर चरेगावकर यांच्यातला वाद टोकाला पोहोचला आहे. शेखर चरेगावकर यांनी भाजपच्या पदाचा गैरवापर केला, असा आरोप मेधा कुलकर्णी यांनी केला आहे. “यशवंत सहकारी बँकेत माजी अध्यक्ष शेखर चरेगावकर यांनी 150 कोटी रुपयांचा घोटाळा केला आहे”, असा आरोप मेधा कुलकर्णी यांनी केला आहे. “ठेवीदारांना त्यांचे पैसे परत मिळण्यासाठी आरबीआयच्या प्रशासकाची नियुक्ती आणि घोटाळ्याची सीबीआय चौकशी करण्याची मागणी केंद्रीय सहकार मंत्री अमित शाह यांच्याकडे केली आहे”, असं मेधा कुलकर्णी यांनी सांगितलं. “सहकार मंत्र्यांकडे गेलो पण काहीच कारवाई झाली नाही”, असंही मेधा कुलकर्णी म्हणाल्या आहेत.
भाजप नेत्याच्या भावाकडून मेधा कुलकर्णी यांना धमकी?
शेखर चरेगावकर यांचे भाऊ शार्दूल चारेगावकर यांनी धमकीचे फोन केले, असा आरोप मेधा कुलकर्णी यांनी केला आहे. त्यामुळे भाजप नेत्यावर भ्रष्टाचाराचे आरोप करणाऱ्या मेधा कुलकर्णी यांना त्याच भाजप नेत्याच्या भावाने धमक्या दिल्याची चर्चा राजकीय वर्तुळात सुरु आहे.
“यशवंत सहकारी बँकेच्या ठेवीदारांना तुम्ही कोणाच्या नादी लागताय? या आधी आम्ही त्यांचं तिकीट कापलं यापुढे देखील त्यांचं तोंड कसं बंद करायचं हे आम्हाला माहीत आहे”, अशी धमकी शार्दूल चारेगावकर यांनी दिल्याचा आरोप मेधा कुलकर्णी यांनी केला आहे. दरम्यान, “सरकारमधील लोकांकडून दबाव असल्याचं अधिकारी आम्हाला सांगत आहेत”, असंही मेधा कुलकर्णी यांनी सांगितलं आहे.
काय आहे यशवंत सहकारी बँक भ्रष्टाचार प्रकरण?
ठेवीदारांनी आपल्या कष्टाचे लाखो रूपये यशवंत सहकारी बँकेत ठेवले होते. मात्र, शेकडो कोटींच्या अर्थिक घोटाळ्यामुळे ठेवीदारांना त्यांचे पैसे परत मिळालेले नाहीत. शेखर चरेगावकर हे महाराष्ट्र राज्य सहकार परिषदेचे माजी अध्यक्ष होते. त्यामुळे घोटाळ्याची चौकशी आणि कारवाई होत नसल्याचा आरोप करण्यात येत आहे.