शिर्डीतील साईबाबा हे लाखो भाविक-भक्तांचे श्रद्धास्थान आहे. हजारो भाविक दररोज साईबाबांचे आशीर्वाद घेण्यासाठी या मंदिरात जात असतात. मात्र शुक्रवारी सकाळी साई संस्थानच्या मेल आयडीवर एका अज्ञात व्यक्तीकडून धमकीचा मेल पाठवण्यात आला. आम्ही साईबाबा मंदिर बॉम्बने उडवू, असा उल्लेख या ईमेलमध्ये करण्यात आला होता. त्यानंतर सुरक्षा व्यवस्था अलर्ट मोडवर असून भाविकांनी घाबरून जाऊ नये, असं आवाहन मंदिर प्रशासनासह पोलिसांकडून करण्यात आलं आहे.

साईबाबा संस्थानचे सुरक्षा अधिकारी रोहिदास माळी यांच्या तक्रारीवरून शिर्डी पोलीस ठाण्यात फिर्याद दाखल झाली असून धमकीच्या पार्श्वभूमीवर साईमंदिराची बीडीएस आणि डॉग स्कॉडसह पथकाने कसून तपासणी केली आहे. साईमंदिराच्या सर्व प्रवेशद्वारावर भक्तांचीही कसून तपासणी केली जात असून धमकीचा मेल पाठवणाऱ्या अजित जाकोमोला नावाच्या व्यक्तीविरोधात गुन्हा दाखल करण्यात आला आहे. साईबाबा मंदिराचे हजारो सुरक्षा कर्मचारी आणि पोलीस पथक भक्तांची काळजी घेण्यास सक्षम असून देशभरातील साईभक्तांनी निश्चिंतपणे साईदर्शनाला यावं, असं आवाहन साईमंदिराचे कार्यकारी अधिकारी गोरक्ष गाडीलकर यांनी केले आहे.

दरम्यान, यापूर्वी देखील शिर्डीच्या साई संस्थानला धमकीचे मेल आल्याच्या घटना घडल्या होत्या. परंतु यापूर्वीचे पत्र आणि मेल फेक असल्याचं स्पष्ट झालं होतं. अशातच साई संस्थानला पुन्हा धमकीचा मेल आल्याने खोडसाळपणातून कोणी हे कृत्य केले आहे का, या अनुषंगानेही पोलिसांकडून तपास केला जात आहे.