अंधत्व निवारण मोहिमेअंतर्गत डब्ल्यूएचओच्या मार्गदर्शनाखाली नेपाळच्या काठमांडूत आयएपीबी अर्थात जागतिक अंधत्व निवारण संस्थेमार्फत तीन दिवसीय शिखर परिषदेचे आयोजन करण्यात आले होते. या परिषदेला 140 देशांचे 700 हून अधिक प्रतिनिधी उपस्थित होते. या परिषदेत बदलापूरच्या व्हिजन फ्रेंड साकीब गोरे या सामाजिक संस्थेने सादर केलेला 33 रुपयांतील सर्वात स्वस्त चष्मा चर्चेचा विषय ठरला. परिषदेसाठी आलेल्या सर्वांसाठीच हा चष्मा कुतुहलाचा विषय होता.

आयएबीपीच्या अध्यक्षा कॅरोलीन केसी, सीईओ पीटर हॉलंड, युनायटेड नेशन्सचे ॲम्बेसिडर वेबसन, डब्ल्यूएचओचे स्टुअर्ड किल आणि इतर मान्यवरांनीही हा जगातील सर्वात स्वस्त चष्मा असल्यावर शिक्कामोर्तब केले. सध्याच्या घडीला जगभरात 1.1 अब्ज लोक चष्म्यापासून वंचित आहेत. यात आफ्रिकन देशांसोबत अमेरिकेचाही समावेश आहे. जगातील तळागाळातल्या लोकांपर्यंत हा चष्मा पोहचावा या उद्देशाने साकिब गोरे यांनी संपूर्ण भारतीय बनावटीचा चष्मा बनवला आहे.

व्हिजन फ्रेंड साकिब गोरे या संस्थेने 33 रुपयांपासून 260 रुपयांपर्यंत देवाभाऊ चष्म्याची सीरिज बनवली आहे. आता काठमांडूतल्या समीटनंतर अमेरिका, आफ्रिकन खंडातील देश, फिलिपाईन्स, सिंगापूर, इथिओपिया, दक्षिण कोरिया, आशियाई तसेच आखाती देशांसह जवळपास 140 देशांमध्ये 0.38 डॉलर म्हणजेच 33 रुपयांतील चष्मा उपलब्ध होण्याचा मार्ग मोकळा झाला आहे. यानिमित्ताने बदलापूरसह महाराष्ट्राचा डंका जगभरात वाजणार आहे.