फहीम खानला १८ मार्च रोजी गणेशपेठ पोलिसांनी देशद्रोहासह विविध गंभीर गुन्ह्यांत अटक केली होती. त्याची पोलीस कोठडी ३१ मार्च रोजी संपल्याने त्याला न्यायालयात हजर करण्यात आले होते. त्यानंतर न्यायालयाने त्याला पुढील सुनावणीपर्यंत न्यायालयीन कोठडीत ठेवण्याचा आदेश दिला. दरम्यान, फहीमच्या नियमित जामिनासाठी मंगळवारी १ एप्रिलला सत्र न्यायाधीश ओझा यांच्यासमोर सुनावणी झाली. न्यायालयाने त्याचा जामीन अर्ज फेटाळला, त्यामुळे त्याला आणखी काही दिवस तुरुंगातच राहावे लागणार आहे.

महाल हिंसाचाराचा मुख्य सूत्रधार

फहीम शमीम खान (वय ३८, रा. संजयबाग कॉलनी, नागपूर) याने धार्मिक तेढ निर्माण करण्यासाठी चिथावणी दिल्याचा आरोप आहे. त्याच्या प्रक्षोभक भाषणांमुळे दोन गटांत वाद निर्माण झाला आणि शहरात दंगल उसळली. या प्रकरणात गणेशपेठ पोलिसांनी साहाय्यक पोलीस निरीक्षक जितेंद्र गाडे यांच्या तक्रारीवरून गुन्हा दाखल केला होता.

न्यायालयात आरोपीतर्फे अॅड.अश्विन इंगोले यांनी बाजू मांडली, तर सरकारतर्फे अ‍ॅड. मेघा बुरंगे यांनी युक्तिवाद केला. सरकारी वकिलांनी फहीम खानवर लावण्यात आलेले गुन्हे गंभीर स्वरूपाचे असल्याने त्याला जामीन देऊ नये, असा युक्तिवाद केला. फहीमला न्यायालयीन कोठडीत पाठवण्यात आल्यामुळे पोलिसांना या प्रकरणाचा अधिक तपास करण्यासाठी वेळ मिळेल. नागपूर पोलिसांकडून हिंसाचाराशी संबंधित इतर संशयितांवरही करडी नजर ठेवली जात आहे.