Pune Man Killed his Brother : पुण्यात स्वारगेट बस स्थानकावर एका तरुणीवर अत्याचार झाल्याची घटना ताजी असतानाच आता आणखी एक धक्कादायक घटना समोर आली आहे. पुणे जिल्ह्यात सख्ख्या भावानेच भावाची हत्या केल्याची माहिती समोर आली आहे.
नेमकं काय घडलं?
पुण्यात किरकोळ वादातून सख्ख्या भावाकडून भावाची हत्या करण्यात आल्याची धक्कादायक घटना समोर आली आहे. शेवग्याच्या शेंगा तोडल्यावरुन सख्ख्या भावांमध्ये तुंबळ हाणामारी झाली. पुण्याच्या आंबेगाव तालुक्यातील महाळुंगे पडवळ येथे ही घटना घडली. घरासमोरच दोन्ही भावांमध्ये हाणामारी झाली. चंद्रकांत चाचकर असं मृत्यू झालेल्या भावाचं नाव आहे. या घटनेनंतर मृतकाच्या कुटुंबातील महिलेने घडलेली घटना माध्यमांना सांगितली.
“सचिन, दत्ता आणि त्याची बायको मंदा हे तिघेजण गाडीवरुन आले. ते शिवीगाळ करत आले. मी म्हटलं आपण दादांना सांगू. तुम्ही त्यांच्याशी बोला. दादा म्हणाले, ती पोरं माझं ऐकतात. तुम्ही काही खाली येऊ नका. कारण ते तावून आले म्हटल्यावर वातावरण खराब होईल. तुम्ही येऊ नका. मी त्यांच्यासोबत बोलतो. ते माझं ऐकतील. यानंतर ते आले, त्यांनी येताच दादांना रस्त्यावर पाडलं”, अशी प्रतिक्रिया मृतकाच्या कुटुंबातील महिलेने दिली.
Pune Crime Swargate Depot: स्वारगेट डेपोतील CCTVमध्ये भलतीच दृश्यं कैद; आरोपी गेला कुठे? कॅमेऱ्यात काय दिसलं?
दरम्यान, या प्रकरणाची गंभीर दखल पोलिसांनी घेतली आहे. पोलिसांकडून प्रकरणाचा सखोल तपास सुरु आहे. पोलिसांना या घटनेची माहिती मिळताच पोलिसांनी घटनास्थळी जावून पंचनामा केला होता. तसेच आरोपींना पकडण्यासाठी पोलिसांनी तातडीने कारवाईला सुरुवात केली. या प्रकरणी पोलीस काय-काय कारवाई करतात? याची माहिती लवकरच समोर येईल. पण भावानेच भावाची हत्या केल्यामुळे परिसरात हळहळ व्यक्त केली जात आहे. तसेच या प्रकरणाची परिसरात सध्या प्रचंड चर्चा सुरु आहे.
लेखकाबद्दलचेतन पाटीलचेतन पाटील हे सध्या महाराष्ट्र टाइम्स ऑनलाईन टीममध्ये डिजीटल कंटेंट प्रोड्यूसर म्हणून कार्यरत आहेत. चेतन यांनी याआधी tv9 मराठी, News18 लोकमत, आपलं महानगर येथे काम केलं आहे.… आणखी वाचा