चित्रपट पाहण्यासाठी आलेल्या दोन सराईत गुन्हेगारांना गुन्हे शाखेच्या युनिट सहाच्या पथकाने पकडले. हडपसर परिसरातील वैभव टॉकिज परिसरात पोलिसांनी ही कारवाई केली. धर्मेनसिंग ऊर्फ भगतसिंग सुरजितसिंग भादा (वय २२) आणि बादशाहसिंग पोलादसिंग भोंड (वय २३, दोघेही रा. शिव कॉलनी, दिघी) अशी अटक केलल्यांची नावे आहेत. पोलिसांनी दिलेल्या माहितीनुसार, दोन्ही आरोपींवर यापूर्वी महाराष्ट्र संघटित गुन्हेगारी नियंत्रण कायदा (मकोका), ‘एनडीपीएस’ कायदा आणि शस्त्र कायद्यानुसार दिघी पोलिस ठाण्यात गुन्हे दाखल आहेत. शुक्रवारी (२१ फेब्रुवारी) गुन्हे शाखेच्या युनिट सहाचे अधिकारी आणि अंमलदारांकडून कोम्बिंग ऑपरेशन केले जात होते.

या वेळी अंमलदार नितीन मुंढे व कानिफनाथ कारखेले यांना आरोपींविषयी माहिती मिळाली. आरोपी हडपसरमधील वैभव टॉकीज परिसरात छावा चित्रपट बघण्यासाठी आले असल्याचे समजले. त्यानंतर युनिट सहाचे सहायक निरीक्षक मदन कांबळे आणि त्यांच्या पथकाने आरोपींना ताब्यात घेतले. पुढील तपासासाठी आरोपींना दिघी पोलिसंच्या ताब्यात दिले आहे. आरोपींनी आणखी काही गुन्हे केले आहेत का, याचीही पोलिस तपास करीत आहेत.

छावा चित्रपटाने बॉक्स ऑफिसवर जमावला गल्ला

छावा चित्रपटाने सात दिवसांमध्ये २०० कोटींचा पल्ला पार केला आहे. २०२५ मधील छावा २०० कोटींचा आकडा पार करणारा पहिला चित्रपट ठरला आहे. सात दिवसांमध्ये छावा चित्रपटाने २१९.७५ कोटींची गल्ला जमवला आहे. बॉलिवूड अभिनेता विकी कौशल याने छत्रपती संभाजी महारजांची भूमिका साकारली आहे.