सुरेश धस म्हणाले, मी पाच टर्म आमदार राहिलो आहे, एकदा राज्यमंत्री होतो तरीही माझ्या गाडीसमोर अशी पोरकट लक्षणं हे लोक करतात. हे दगड घेऊन मला मारणार होते का? ते दगड घेऊन मला मारणार नाहीत. मात्र आम्ही यांच्यासाठी काहीतरी करतो हे दाखवण्यासाठीची ही स्पर्धा आहे. रस्त्यावर जे लोक निषेध करायला आले ते हे एकतर गाळेधारक असावेत नाहीतर वीटभट्टीवाले असावेत, असा प्रहार धसांनी केला.
धस यांची कार रोखण्याचा प्रयत्न, मुंडे समर्थक आक्रमक; काळे झेंडे दाखवले, तणावपूर्ण परिस्थिती
पुढे सुरेश धस यांनी आंदोलकांना खुले चॅलेंज दिले आहे. लोकशाही मार्गाने काळे झेंडे दाखवण्याचा अधिकार आहे, तो त्यांनी करावा. मात्र पोलिसांसमोर दगड उचलण्याची मजल या लोकांची जाते. माजी पालकमंत्री असलेल्या नेत्याच्या भागातील आणि दुसऱ्या मंत्री असलेल्या नेत्याच्या भागातील लोक हे असे वागतात. आम्ही देखील आष्टीला आल्यानंतर त्यांना काळे झेंडे दाखवू मात्र लोकशाही मार्गाने. रस्त्याच्या कडेला उभे राहून नाही… ही लोकशाही नाही तर ठोकशाही असल्याचे धस यांनी म्हटले.

सुरेश धस यांनी आज मस्साजोग गावात जाऊन संतोष देशमुख कुटुंबीयांची भेट घेतली. यावेळी सुरेश धस यांच्या वाहनांचा ताफा अडवण्याचा प्रयत्न करण्यात आला. यावेळी धनंजय मुंडे यांच्या समर्थनार्थ घोषणाबाजी केली असून धस यांना आंदोलकांकडून काळे झेंडे दाखवण्यात आले. पोलिसांनी काही तरुण आंदोलकांना ताब्यात घेतले आहे. यानंतर मात्र धस-मुंडे संघर्ष पुन्हा बळावण्याची शक्यता आहे.