Mumbai Underground Metro : बहुचर्चित ‘मेट्रो ३’या भूमिगत मार्गिकेचा दक्षिणेकडील विस्तार रखडला आहे. विस्ताराचा प्रस्ताव मागील वर्षीपासून राज्य सरकारकडे प्रलंबित आहे. हा डीपीआर मंजूर झाल्यास कामाला गती मिळणार आहे.
मेट्रो ३ ही राज्यातील सर्वाधिक लांबीची व देशातील १०० टक्के भूमिगत मार्गिका आहे. ऑक्टोबर २०२४मध्ये, दोन वर्षे विलंबाने आरे जेव्हीएलआर ते बीकेसी हा मार्गिकेचा पहिला टप्पा सुरू झाला. या १२.६९ किमीच्या मार्गिकेदरम्यान दहा स्थानके आहेत. आता पुढील टप्पा धारावी ते आचार्य अत्रे चौक हा मार्च २०२५अखेर आणि त्यानंतर कफ परेडपर्यंतचा टप्पा मे २०२५अखेर सुरू करण्याचे
नियोजन आहे. ही मार्गिका कफ परेडपर्यंत सुरू झाल्यानंतर ती एकूण ३३ किमी व २७ स्थानकांची असेल. त्यातील २६ स्थानके भूमिगत व एक स्थानक जमिनीवर असेल. मात्र त्याखेरीज २८वे स्थानकही या मार्गिकवर प्रस्तावित आहे. मात्र तो विस्तार राज्य सरकारकडे रखडला आहे.
सूत्रांनी दिलेल्या माहितीनुसार, कफ परेडच्या पुढे नौदल वसाहतीपर्यंत मेट्रो पोहोचावी, अशी मागणी नौदलाकडून पाच वर्षांपूर्वी करण्यात आली होती. त्यासाठीच कफ परेड ते नेव्हीनगर या मार्गिका विस्ताराचा बृहत् प्रकल्प आराखडा (डीपीआर) मुंबई मेट्रो रेल कॉर्पोरेशन लिमिटेडने तयार करून राज्य सरकारकडे पाठवला. २३ सप्टेंबर २०२४ रोजी हा आराखडा शहर विकास विभागाकडे पाठविण्यात आला. मात्र त्याला अद्याप मंजुरी मिळालेली नाही.
याबाबत मागील महिन्यात सीएम वॉररूममध्ये चर्चाही झाली. मात्र त्यामध्ये डीपीआरला मंजुरी देण्याबाबत ठोस निर्णय झालेला नाही, असे सूत्रांनी सांगितले. यासंबंधी मुंबई मेट्रो रेल कॉर्पेरिशन लिमिटेडला विचारले असता, त्यांच्याकडून कुठलीही प्रतिक्रिया देण्यात आली नाही.
स्थानक भूमिगत की जमिनीवर, हेच ठरेना
या मार्गिकेचे उत्तर दिशेकडील टोक ‘आरे जेव्हीएलआर’ हे स्थानक असून तेच एकमेव स्थानक जमिनीवर आहे. तर, प्रस्तावित ‘नेव्हीनगर’ हे अखेरचे स्थानक असेल. मात्र ते भूमिगत ठेवायचे की जमिनीवर, यासंबंधीच्या संभ्रमामुळे डीपीआर रखडल्याचे सूत्रांचे म्हणणे आहे.
लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड.… आणखी वाचा