देशमुख यांचे बंधू धनंजय देशमुख, वैभवी देशमुख हे आपली बाजू समजावून सांगण्यासाठी गडावर गेले. नामदेव शास्त्री यांची भेट घेऊन संतोष देशमुख यांच्या खूनामागील खरे कारण, आरोपींचा पूर्व इतिहास, त्यांची गुंडगिरी, खंडणीचे प्रकार, त्यांच्यावरील गुन्हे हे पुराव्यानिशी मांडले. या वेळी धनंजय देशमुख यांनी ‘आम्ही कधीच जातीवाद केला नसून आमची जमीन मुंडे कुटुंब दोन पिढ्यांपासून कसत आहे. त्यांनी पिकविलेले अन्नधान्य आम्ही खात आहे,’ असे सांगितले.

‘लोकप्रतिनीधी जातीयवादी नाहीत’

‘आमची कोणतीही गुन्हेगारी नसून १५ वर्षे सरपंच राहिलेल्या माणसाशी या लोकांनी संपर्क साधायला हवा होता. आरोपींवर आतापर्यंत अनेक गुन्हे दाखल करण्यात आलेले आहेत. ज्याला आरोपींची बाजू घ्यायची, त्यालाच जातीयवादाचा अंश येत आहे. आरोपी त्यांच्या कार्यालयात बसायचे, त्यांच्या गाडीत फिरायचे. हा न्यायाचा लढा आहे. अतिशय क्रूर हत्या झाली आहे. प्रत्येक क्षेत्रातील लोक आपल्यासोबत आहेत. राजकीय नेते, संप्रदायाचे लोक, सामाजिक कार्यकर्ते ते आमच्यासोबत व न्यायाच्या भूमिकेत आहेत. अशा वेळी लोकप्रतिनिधींना जातीयवादी म्हणू नका. नाही तर ते कोणत्याच न्यायाच्या भूमिकेत येणार नाही. न्याय मागणाऱ्या लोकप्रतिनिधींना चुकीचे ठरवू नका,’ अशी विनंती धनंजय देशमुख यांनी केली.

‘खऱ्या आरोपीला शिक्षा व्हावी’

नामदेव शास्त्री म्हणाले, ‘संतोष देशमुख यांनी किती काम केले, हे त्यांनी दाखवले. ते मूळचे बाबांचे आहेत, हे आज कळाले. त्यांची जमीन तीन पिढ्यांपासून वंजारी कुटुंब करीत आहे. जातीयवाद न करता खऱ्या आरोपीला शिक्षा व्हावी हे गादीवरून सांगणे आहे. आम्ही बसून बोलू. त्यांना दोन घास खाऊ घालू. त्यांना प्रसाद देऊ.,’ असे ही शास्त्री म्हणाले.