शनिवारी घरुन निघाले आणि बेपत्ता झाले, पोलिसांकडून शोध सुरु

याप्रकरणी मिळालेल्या माहितीनुसार, रोशन हे २००८ मध्ये लोहमार्ग पोलिसांत दाखल झाले होते. शनिवारी दुपारी कार्यालयातील काम आटोपून ते घरी गेले. त्यानंतर चहा घेतल्यानंतर एटीएममध्ये पैसे जमा करायचे असल्याचं सांगून ते मोटारसायकलने घरून निघाले. दरम्यान, रात्र होऊनही ते घरी परतले नाहीत. त्यामुळे नातेवाइकांनी शोध घेतला असता रोशन गिऱ्हेपुंजे हे कुठेही आढळून आले नाहीत. त्यानंतर रोशन बेपत्ता असल्याची तक्रार अजनी पोलिस ठाण्यात देण्यात आली होती. पोलिसांनी तात्काळ या घटनेची नोंद घेत रोशन गिऱ्हेपुंजे यांचा शोध सुरू केला. त्यांच्या मोबाइलचे लोकेशन तपासून पाहिले असता ते जबलपूर येथे आढळून आले. त्यानंतर वेळोवेळी रोशन गिऱ्हेपुंजे यांच्या मोबाइलचे लोकेशन बदलत जात होते.

कुही येथील शेतात झाडाला गळफास घेतलेला मृतेदह आढळून आला

त्यानंतर शनिवारी (१४ डिसेंबर) सकाळी ११ वाजताच्या सुमारास कुही पोलिस ठाण्याच्या हद्दीतील वडेगाव परिसरातील एका शेतातील झाडाला रोशन यांचा गळफास घेतलेला मृतदेह एका शेतकऱ्याला दिसला. त्याने कुही पोलिसांना माहिती दिली. पोलिसांचा ताफा तेथे पोहोचला. पोलिसांनी पंचनामा करून मृतदेह शवविच्छेदनासाठी हॉस्पिटलकडे रवाना केला. घटनास्थळी पोलिसांना त्यांची मोटारसायकलही आढळली. त्यांच्या आत्महत्येचे कारण कळू शकले नाही. याप्रकरणी पोलिसांनी आकस्मिक मृत्यूची नोंद करून तपास सुरू केला आहे. त्यांच्या मागे पत्नी वैष्णवी (वय ३०), चार वर्षांची मुलगी मृण्मयी व मोठा आप्तपरिवार आहे. रोशन यांच्या आत्महत्येने गिऱ्हेपुंजे कुटुंबावर दु:खाचा डोंगर कोसळला आहे.