अहमदनगर : माणूस हा नेहमी खेळाडू असला पाहिजे. स्पर्धा असो किंवा नसो मी स्पर्धेची तयारी करत असतो. मी खेळ खेळणारा माणूस आहे, असे सांगताना अहमदनगर दक्षिण लोकसभेच्या आखाड्यातून खड्डू ठोकणारच असे संकेतच राष्ट्रवादी अजित पवार गटाचे आमदार निलेश लंके यांनी दिले. शरद पवार यांच्यासोबत जाण्याच्या वावड्या उठत आहेत, परंतु कधी काय होईल हे सांगू शकत नाही. अजून पुलाखालून बरंच पाणी वाहून जायचंय, असे कोड्यातच सांगताना त्यांनी ठामपणे अजितदादांसोबतच राहणार, असे सांगणेही टाळले. त्यामुळे जागावाटपात जर नगर दक्षिणची जागा भाजपकडे गेली तर राष्ट्रवादी शरद पवार गटाकडून निलेश लंके उमेदवार असू शकतात, ही शक्यता अद्याप कायम आहे.

गेल्या काही दिवसांपासून निलेश लंके शरदचंद्र पवार गटात प्रवेश करण्याविषयीच्या चर्चा जोरदारपणे सुरू आहे. या चर्चा केवळ राजकीय वर्तुळातच नाही तर अजित पवार यांच्या आमदारांमध्येही होत आहेत. दादा गटातील आमदार अमोल मिटकरी यांनीही ट्विटरवरून लंके यांना पक्ष न सोडण्याची विनंती केली. तसेच दादा गटातील मंत्री असलेले धर्मरावबाबा आत्राम यांनी एक आमदार गेला तर आम्हाला फरक पडत नाही, असे विधान करून पक्षात काहीतरी उलटसुलट सुरू आहे, यावर शिक्कोमोर्तब केले. अशा सगळ्या चर्चा-शक्यतांच्या पार्श्वभूमीवर निलेश लंके यांनी पत्रकार परिषद घेऊन आपली भूमिका स्पष्ट केली.
नीलेश लंके घरवापसी करण्याच्या चर्चेत तथ्य नाही, खुद्द पवारांनी चर्चा फेटाळल्या, जे सोडून गेलेत…

लोकसभा लढण्याची माझी इच्छा पण…

अहमदगर दक्षिण लोकसभा लढविण्याची आमच्या सगळ्या सहकाऱ्यांची इच्छा आहे. माझीही अनेक महिन्यांपासून तयारी सुरू आहे. जनसंपर्क वाढविण्याचा मला छंद आहे. लोकसंपर्क वाढविण्याचा मला नाद आहे. माझा जिल्ह्याभरात संपर्क आहे, असे सांगताना लोकसभा निवडणुकीची तयारी पूर्ण झाल्याचे संकेतच त्यांनी दिले पण निवडणूक लढवणारच असे लगोलग न सांगता जागा वाटपापर्यंत संयम ठेवू, असेही अप्रत्यक्षपणे सांगितले.
अजित पवारांच्या राष्ट्रवादीचं पुढचं पाऊल,१६ जागांवर चाचपणी, शिंदेंचा २२ जागांवर दावा, भाजपचं टेन्शन वाढणार?

पुलाखालून आणखी बरंच पाणी जायचंय…

स्पष्टपणे काही सांगत नसल्याचे पाहून पत्रकारांनी शरद पवार गटाकडून आपण निवडणूक लढविणार या चर्चेला पूर्णविराम देताय काय? असा प्रश्न केल्यावर मात्र राजकारण काय कुठल्या वळणावर जाईल ते सांगता येत नाही पुलाखालून आणखी बरंच पाणी जायचंय… असे सांगत शरद पवार गटात प्रवेश करण्याविषयीच्या शक्यताही त्यांनी जिवंत ठेवल्या.

अहमदनगर दक्षिणची जागा भाजपकडे आहे. त्यामुळे महायुतीतील घटकपक्ष असलेला दादांचा राष्ट्रवादी त्यावर दावा करत नाही. त्यामुळे तुमची नाराजी आहे का? असा प्रश्न पत्रकारांनी विचारल्यावर ते म्हणाले, महायुतीचे जागावाटप हा वरिष्ठ स्तरावरील विषय आहे. मी स्वत:ला सामान्य कार्यकर्ता समजतो. सामान्य कार्यकर्त्याने इतक्या उच्च स्तरावर चर्चा न केलेली बरी, असेही लंके म्हणाले.