म. टा. प्रतिनिधी, पुणे : पुणे, पिंपरी-चिंचवड शहरासह जिल्ह्यातील विविध भागांत नाताळ, ‘थर्टी फर्स्ट’ पार्ट्यांसाठी जय्यत तयारी सुरू झाली आहे. त्या पार्श्वभूमीवर, शहरात सर्वाधिक मोठ्या प्रमाणात पार्ट्या होत असल्याने रुफटॉप हॉटेल, बंगले, बार, फार्म हाउसवर आता नजर ठेवण्यासाठी उत्पादन शुल्क विभागाने कंबर कसली आहे.
अवैध दारू खरेदी-विक्री रोखण्यासाठी विविध पथकांची स्थापना करण्यात आली आहे. त्याकरिता आज, शुक्रवारपासून महामार्गावरील नाकेबंदी करून वाहनांची तपासणी सुरू करण्यात येणार आहे.
अवैध दारू खरेदी-विक्री रोखण्यासाठी विविध पथकांची स्थापना करण्यात आली आहे. त्याकरिता आज, शुक्रवारपासून महामार्गावरील नाकेबंदी करून वाहनांची तपासणी सुरू करण्यात येणार आहे.
नाताळ आणि त्यानंतर लगेचच नव्या वर्षाच्या सेलिब्रेशनसाठी अनेकांची पार्टीची तयारी झाली असणार. त्या पार्श्वभूमीवर शहरासह परिसरातील हॉटेल, फार्म हाउसमध्ये विविध पार्ट्यांच्या नियोजनाची सुरुवात झाली आहे. उत्पादन शुल्क विभागाने विविध कारवाई करण्याचे नियोजन सुरू केले आहे.
विविध भरारी पथके कार्यान्वित
ख्रिसमस आणि थर्टी फर्स्टच्या पार्ट्यांसाठी रुफटॉप हॉटेल, फार्महाऊस, बंगले या ठिकाणी नियोजन सुरू आहे. अवैध मद्याचा वापर, तसेच विना परवाना बाहेरील राज्यातून मद्य आणून त्याची खरेदी विक्री सुरू केल्यास त्याची तपासण्यासाठी विविध भरारी पथके नियुक्ती केली आहेत. तसेच दोन भरारी पथके, कार्यकारी पथके तसेच तीन विशेष पथकांची नियुक्ती करण्यात आली आहे. प्रत्येक पथकात सात ते आठ कर्मचाऱ्यांचा समावेश असेल.
वाहनांसाठी आजपासून नाकेबंदी
पुणे शहरासह जिल्ह्यातील सासवड, हडपसर, दौंड, तळेगाव दाभाडे, नारायणगाव तसेच पुणे- नाशिक, पुणे -सातारा, पुणे –मुंबई, पुणे -सोलापूर महामार्गाच्या हद्दीवरील महामार्गावरील वाहनांची तपासणीसाठी आज, शुक्रवारपासून नाकेबंदी करण्यात येणार आहे. त्यासाठी १२ कार्यकारी पथके नियुक्त करण्यात आली आहेत. विभागातील पथकांनी त्या त्या भागातील महामार्गावरील वाहनांवर लक्ष केंद्रीत करावे.
विनापरवाना पार्ट्याही रडारवर
राज्याच्या सीमेबाहेरून विना परवाना तसेच उत्पादन शुल्क चुकवून परराज्यातून दारु आणून त्याची खरेदी विक्री करणाऱ्यांवर वॉच ठेवण्यात येणार आहे. वाहनांमध्ये मद्याची वाहतूक करताना आढळल्यास मद्य जप्त करण्याची कारवाई करण्यात येणार आहे, असे उत्पादन शुल्क विभागाच्या अधिकाऱ्यांनी सांगितले. मद्यसेवन करण्यासाठी ‘वन डे’ परमीट न घेता सेवन करणाऱ्यांवरही आता कारवाई करण्यात येणार आहे, असेही सांगण्यात आले.
सेलिब्रेशनसाठी दारुच्या मागणीत वाढ
सेलिब्रेशनच्या नावाखाली ख्रिसमल, थर्टी फर्स्टसाठी मोठ्या प्रमाणत होणाऱ्या पार्ट्यांमध्ये दारुची मागणी वाढण्याची शक्यता उत्पादन शुल्क विभागाच्या अधिकाऱ्यांनी बोलून दाखविली आहे. त्यामुळे बनावट दारुची विक्री होण्याची शक्यता आहे. या पार्श्वभूमीवरही वॉच ठेवण्याचे नियोजन आहे. हातभट्टी निर्मिती केंद्रे, वाहतूक, तसेच विक्री केंद्रावर लक्ष ठेऊन त्यावर कारवाई करण्याची मोहीम वाढविण्यात येणार आहे. या पार्श्वभूमीवर, अवैध दारु निर्मिती अथवा अवैध मद्य निर्मिती वाहतूक तसेच विक्री बाबत माहिती असल्यास १८००२३३९९९९ या टोल फ्री क्रमांकावर संपर्क साधण्याचे आवाहन करण्यात आले आहे.
‘थर्टी फर्स्ट’, नाताळचा उत्सव साजरा करण्यासाठी पुणे शहरासह जिल्ह्यात पार्ट्या करण्यात येत आहेत. त्या दरम्यान रुफ टॉफ हॉटेल, फार्महाऊसची तपासण्यासाठी पथकांची नियुक्ती केली आहे. त्याशिवाय जिल्ह्याच्या सीमेवरील महामार्गावरही वाहनांची तपासणी सुरू करण्यात येणार आहे.- चरणसिंग राजपूत, अधीक्षक, उत्पादन शुल्क विभाग, पुणे