गोला या वडार वस्तीतील रामू पवार हे सुद्धा दगड फोडण्याचे काम करतात. दहावीपर्यंत शिक्षण घेतलेल्या रामू पवार यांनी दगड फोडण्याचे काम मुलांच्या आयुष्यात येऊ नये म्हणून अविनाश व अभिषेक या दोन मुलांच्या शिक्षणाकडे लक्ष केंद्रित केले. त्यांची पत्नी उल्का ही दहावीपर्यंत शिक्षण झालेली त्यामुळे त्यांनी मुलांच्या शिक्षणाचे महत्व ओळखून मुलांना दगड फोडीच्या कामाला न जुंपता शिक्षण घेऊन काहीतरी बनण्याचे सतत पाठबळ दिले.आई वडिलांच्या पाठिंब्यावर त्यांचा मुलगा अविनाश याने मोठे होऊन पोलीस होण्याचे स्वप्न उराशी बाळगले. जवळच्या गोलापांगरी प्राथमिक शाळेत अविनाशने शिक्षण घेतले. त्यानंतर त्याने जालना शहरातील सीटीएमके गुजराती विद्यालयातून दहावीपर्यंतचे शिक्षण घेतले. यानंतर पदवीचे शिक्षण जालना शहरातील अंकुशराव टोपे महाविद्यालयातून पूर्ण केले. शिक्षणात खंड न पडू देता अविनाश ने बी.एससी पर्यंतचे शिक्षण घेतले. तर धाकट्या अभिषेकने बारावीपर्यंत शिक्षण घेतले आहे.
आपली मावशी अलका जाधव या बीड येथील पोलीस दलात भरती झाल्यानंतर अविनाशला मावशीकडून मोठी प्रेरणा मिळाली. बालपणापासून पोलीस होण्याचे स्वप्न उराशी बाळगणाऱ्या अविनाश साठी हा टर्निंग पॉइंट ठरला. मावशीने मिळवलेल्या यशाची प्रेरणा घेत अविनाशने कठोर मेहनत घेतली. २०१६ पासून तो पोलीस भरतीची तयारी करीत होता. मात्र, त्याला यश प्राप्त झाले नव्हते.
२०२३ मध्ये पोलिस दलात पोलीस शिपाई पदाची परीक्षा दिल्यानंतर अविनाशच्या मेहनतीला फळ आले. त्याने केलेला नियमित सराव,अभ्यास आणि जिद्दीच्या जोरावर अविनाश पोलिस दलात भरती झाला. अविनाशला पोलीस दलात निवड झाल्याचे पत्र आले आणि साऱ्या गोला या वडारवाडीला आनंदाचे भरते आले. वस्ती मधील कष्टकरी दगड फोड्याचा मुलगा पोलीस दलात भर्ती झाल्यानंतर वडारवाडीला आकाश ठेंगणे झाले आहे. मुलगा पोलीस झाल्यानंतर मेहनतीला फळ आल्याने आई- वडिलांच्या डोळ्यात आनंदाश्रू आले.
आपल्या मुलांनी दगड फोडण्याचे काम करू नये म्हणून त्यांना आपण खूप शिकवले, त्यांना प्रोत्साहन दिले. आपल्या वडारवाडीत पोलीस झालेला अविनाश हा पहिलाच मुलगा असल्याचा वडारवाडीला अभिमान असल्याचे रामू पवार सांगतात.आपण कष्ट करून तसेच खडतर आयुष्य जगलो असलो तरी दगड फोडण्याचे काम करणाऱ्या सामान्य कष्टकऱ्याचा मुलगा पोलीस झाल्याचा अभिमान पवार कुटुंबीय आणि वस्तीला आहे असे त्यांनी सांगितले.
डीवायएसपी व्हायचयं!
पोलीस दलात भर्ती झाल्यानंतर अविनाश पवार हा आनंदाने भारावून गेला असून वडारवाडीतील मुलगा पोलीस दलात भरती झाल्यानंतर वडारवाडीतील नागरिकांनी काल शुक्रवारी अविनाशची गावातून मिरवणूक काढली. पोलीस दलात भर्ती होण्याचे आपले स्वप्न होते ते पूर्ण झाले असून भविष्यात आपणास डीवायएसपी व्हायचंय असं अविनाशने ठरवलं आहे.