श्रावण महिन्यात भीमाशंकर परिसरात देशभरातून मोठ्या संख्येने भाविक दर्शनासाठी येतात. याकाळात मंदिराच्या आवारात मोठ्या प्रमाणावर गर्दी असते. यामुळे मंदिर प्रशासनाने मंदिराचा गाभारा, मुख्य मंडप आणि परिसरामध्ये गर्दी होऊन भाविकांची गैरसोय होऊ नये आणि सर्वांना दर्शन सुलभतेने व्हावे; तसेच कुठलीही अनुचित घटना घडू नये, मंदिराचे पावित्र्य राखले जावे यासाठी मोबाइलचा वापर आणि छायाचित्रणास बंदी केल्याची माहिती देवस्थानचे अध्यक्ष सुरेश कौदरे, उपाध्यक्ष विकास ढगे पाटील यांनी दिली.

भीमाशंकर येथे येणाऱ्या भाविकांनी गाभारा, मुख्य मंडप आणि मंदिर परिसरात छायाचित्रण करू नये; तसेच मोबाइल बंद ठेवून सहकार्य करावे, असे आवाहन देवस्थानतर्फे करण्यात आले आहे. यामुळे मोबाइल वापरताना किंवा छायाचित्रण करताना कोणी आढळल्यास त्यांच्यावर देवस्थानच्या वतीने दंडात्मक कारवाई करण्यात येणार आहे.