दरम्यान कोकणात पावसाने जोरदार हजेरी लावली आहे. यामुळे अनेक भागात पूरसदृश्य स्थिती निर्माण झाली आहे. दापोली, खेड, चिपळूणमध्ये पावसाची दमदार बॅटींग सुरू आहे. यामुळे जनजीवन विस्कळीत झाले आहे. दापोली-लाटवण मार्गावरील लाटवण चौकीजवळ दरड कोसळली आहे. कोकणात चिपळूणमध्ये वशिष्ठी नदीने इशारा पातळी ओलांडली आहे. नाईक कंपनी/ मच्छी मार्केट, वडनाका, मुरादपूर येथील काही ठिकाणी १ फूट पाणी भरलेले आहे. सध्या पाणी कमी होत आहे.

दापोली शहराजवळ जालगाव गावामध्ये ग्रामपंचायतीच्या मागील बाजूस नवीन वसाहतीत समर्थ नगर येथे असलेल्या काही घरांना पाण्याचा वेढा पडला आहे. या सगळ्यावरती प्रशासन यातून मार्ग काढण्याचा प्रयत्न करते आहे. मात्र पाण्याचा निचरा होण्यासाठी नैसर्गिक जागाच उपलब्ध नसल्याने येथील रहिवासी मोठ्या चिंतेत आहेत. स्थानिक प्रशासन आणि तालुका प्रशासन या सगळ्यावर लक्ष ठेवून आहे. सरपंच अक्षय फाटक आणि प्रशासनाने यांनी या सगळ्या भागाचा फिरून दौरा केला आहे. तहसीलदार अर्चना बोंबे यांनीही या ठिकाणी जाऊन नागरिकांना योग्य त्या सूचना दिल्या आहेत. वेळ पडल्यास येथील नागरिकांना हलवण्याची तयारीही प्रशासनाने ठेवली आहे. तर येथील काहींना घराच्या वरील मजल्यावर शिफ्ट करण्यात आले आहे. आपत्कालीस्थितीत त्यांच्या व्यवस्थेसाठी प्रशासन सज्ज झाले आहे.