जळगाव : अजित पवार यांच्यासह आमदारांचा एक गट राष्ट्रवादीतून बाहेर पडला आहे. राज्यात मोठा राजकीय भूकंप झाला आहे. अजित पवार यांच्यासोबत फुटलेल्या आमदारांमध्ये जळगाव जिल्ह्यातील राष्ट्रवादीतील विधानसभेचे एकमेव आमदार अनिल भाईदास पाटील यांचाही समावेश झाला आहे. अनिल पाटील हे राष्ट्रवादी काँग्रेसचे मुख्य प्रतोद आहेत.
अजित पवार यांच्यासोबत अनिल भाईदास पाटील यांनीही मंत्रीपदाची शपथ घेतली. त्यांच्या निमित्ताने जळगाव जिल्ह्याला तिसरे मंत्री पद मिळाले आहे. राष्ट्रवादीच्या विधानसभेच्या जळगाव जिल्ह्यातील एकमेव आमदारही अजितदादा पवार यांच्यासोबत गेल्याने जळगाव जिल्ह्याचा राजकारणात मोठी खळबळ उडाली आहे.
अजित पवार यांच्यासोबत अनिल भाईदास पाटील यांनीही मंत्रीपदाची शपथ घेतली. त्यांच्या निमित्ताने जळगाव जिल्ह्याला तिसरे मंत्री पद मिळाले आहे. राष्ट्रवादीच्या विधानसभेच्या जळगाव जिल्ह्यातील एकमेव आमदारही अजितदादा पवार यांच्यासोबत गेल्याने जळगाव जिल्ह्याचा राजकारणात मोठी खळबळ उडाली आहे.
आज राज्याच्या राजकारणात मोठ्या नाट्यमय घडामोडी घडल्या आहेत. आज सकाळपासून अजित पवार यांच्या निवासस्थानी पक्षाच्या नेत्यांची बैठक सुरू झाली. यानंतर इतर नेते हे शरद पवार यांच्या निवासस्थानी जमा झाल्याने काही तरी मोठे घडणार असल्याचे स्पष्ट झाले. यानंतर दुपारी दीड वाजेच्या सुमारास अजित पवार हे आपल्या सहकार्‍यांसह राज्य सरकारमध्ये सहभागी होणार असल्याची माहिती समोर आल्याने एकच खळबळ उडाली. यानंतर अजित पवार हे आपल्या सहकार्‍यांसह राजभवनाकडे निघाले.
दादा-भाईंच्या सरकारला फडणवीसांची सोबत, अजित पवारांनी निर्णय का घेतला? एकनाथ शिंदे म्हणाले…
राजभवनात तातडीने मंत्रीमंडळाच्या शपथविधीची तयारी सुरू झाली. यात पहिल्यांदा अजित पवार यांनी उपमुख्यमंत्री शपथ घेतली. यानंतर छगन भुजबळ यांच्यासह अन्य नेत्यांनी देखील शपथ घेतली. यात अमळनेरचे आमदार अनिल भाईदास पाटील यांनी देखील मंत्रीपदाची शपथ घेतली. अजित पवार यांच्यासह राष्ट्रवादीच्या नऊ आमदारांनी आज मंत्रीपदाची शपथ घेतली.
पवारांची गुगली, फडणवीसांची बॅटिंग, अजित पवार सेफ अन् आज मोठा गेम; महाराष्ट्रात महाड्रामा
अनिल भाईदास पाटील राष्ट्रवादी काँग्रेसचे मुख्य प्रतोद तसेच जळगाव जिल्ह्यातील अमळनेर तालुक्यातील विधानसभेचे विद्यमान आमदार आहेत. अनिल पाटील हे अजितदादा पवार यांचे अतिशय जवळचे सहकारी आहेत. पहाटेच्या शपथविधीच्या वेळीही अनिल पाटील हे अजित पवारांसोबत होते. यानंतरच्या कालखंडातही ते अजितदादांचे निकटवर्तीय म्हणूनच ओळखले जात आहेत.
गेल्यावेळीही अजित पवार हे नॉट रिचेबल झाल्यामुळे ते भाजपत जाणार असल्याच्या चर्चांना उधाण आले होते. यावेळी अनिल भाईदास पाटील यांनी मी अजित पवार हे कुठेही असतील तरी त्यांच्यासोबत असल्याचे वक्तव्य केले होते. आता आजच्या घटनेनंतर अनिल पाटील हे अजित पवार यांचे कट्टर समर्थक असल्याचा शिक्कामोर्तब झाले आहे. दरम्यान, अनिल पाटील यांनी अजित पवार यांच्यासोबत मंत्रीपदाची शपथ घेतल्यामुळे या माध्यमातून जळगाव जिल्ह्यास तिसरा मंत्री मिळाला आहे.
दरम्यान, पंधरा दिवस ते महिनाभरापूर्वीच राष्ट्रवादी काँग्रेसचे अमळनेर येथे राज्यस्तरीय कार्यकर्ता प्रशिक्षण शिबिर पार पडले होते. या कार्यक्रमाला शरद पवार यांच्यासोबत अजित पवार यांचीही उपस्थिती होती. यादरम्यान अजित पवार आणि अनिल भाईदास पाटील यांच्यात आज झालेल्या फुटी बाबत चर्चा झाल्याची सूत्रांची माहिती आहे.
राष्ट्रवादी काँग्रेसचे जळगाव जिल्ह्यामध्ये अनिल भाईदास पाटील हे विधानसभेचे तर एकनाथ खडसे यांनी राष्ट्रवादी काँग्रेसमध्ये प्रवेश केल्यानंतर काही दिवसानंतर ते विधान परिषदेचे आमदार झाले होते. आता राष्ट्रवादीचे मुख्य प्रतोद अनिल भाईदास पाटील हे अजित पवार यांच्यासोबत गेल्याने जळगाव जिल्ह्यातल्या राष्ट्रवादी काँग्रेस पक्षाच्या संघटना वाढीवर त्याचा मोठा परिणाम होणार आहे.