या घटनेबाबत मिळालेल्या माहितीनुसार, सोलापूर शहरातील एका नामांकित महाविद्यालयात एमएसडब्ल्यूचे शिक्षण घेत असलेल्या विद्यार्थ्याकडे काही तरूणी आल्या. त्या नोकरीनिमित्त बोलत बसल्या. काही वेळाने दुसऱ्या अन्य एका समाजाचे तरुण आले व तू आमच्या धर्मातील मुलींसोबत का बोलतो असा जाब विचारू लागले. काही समजण्याअगोदर टोळक्यातील तरुणांनी पीडित तरुणास एमआयडीसी परिसरात नेले व जबर मारहाण करू लागले.
तेथे त्याच्या डोक्यावर व पाठीवर मारहाण करून त्याला जखमी करण्यात आले. ही घटना बुधवारी दुपारी पावणे तीन ते चार वाजण्याच्या दरम्यान घडली. जखमी अवस्थेत असताना पीडित तरुणाने मारहाण करणाऱ्याचे मोबाईल नंबर घेतले होते. बुधवारी रात्री जखमी झालेल्या तरुणाने जेलरोड पोलीस ठाण्यात फिर्याद दिली आहे. पीडित तरुणाने फिर्याद देताना महत्वाची बाब नमूद केले असून आमच्या धर्मातील मुलीला फसवतो का, लव जिहाद करतो का, असे म्हणत १५ जणांनी त्याला लाकडाने व दगडाने मारहाण केली आहे.
त्वरित करवाई करून एका संशयितास अटक
शहर पोलीस दलातील पोलीस उपायुक्त विजय कबाडे यांनी या घटनेवरून त्वरित कारवाई करण्याचे आदेश जेलरोड पोलिसांना दिले होते. शहर पोलिसांनी ताबडतोब तपास करत बुधवारी मध्यरात्री व गुरुवारी पहाटेच्या सुमारास एका संशयितास अटक करून त्याला कोर्टात हजर केले आहे. इतर १० ते १५ जणांचा तपास सुरू आहे. अटक केलेल्या संशयित आरोपीस न्यायालयीन कोठडी मंजूर झाली आहे. या प्रकरणात १० ते १५ जणांविरोधात भा.द वि. ३६३, ३२४, ३४१, १४३, १४७, १४९, ५०४, व ५०६ प्रमाणे गुन्हा दाखल झाला आहे.
याबाबत विजय कबादे यांनी माध्यमांना माहिती देताना सांगितले की, दोन समाजात तेढ निर्माण करण्याचे कोणी षडयंत्र करत असेल तर सोलापूर पोलीस त्यांवर कठोर कारवाई करेल. दरम्यान, सोशल मीडियावर सोलापूर सायबर पोलीस नजर ठेवून आहेत.