टिटवाळा-सीएसएमटी लोकलमध्ये बिघाड

मुलुंड रेल्वे स्थानकाच्या प्लॅटफॉर्म क्रमांक २वर ही एसी लोकलचा एसी बंद पडली. सकाळी ८.३३ ची टिटवाळा ते सीएसएमटी एसी लोकल सकाळी साडे नऊच्या सुमारास मुलुंड रेल्वे स्थानकावर दाखल होते. मध्य रेल्वेवर सीएसएमटीकडे जाणाऱ्या दिशेला यावेळी प्रचंड गर्दी असते. या एसी लोकलमध्येही प्रवाशांची संख्या मोठी असते. मुलुंड रेल्वे स्थानकात अचानक ही लोकल १५ मिनिटांसाठी ठप्प होती. एसी लोकलचे दरवाजेही बंद होते. वातानुकूलित यंत्रणा बंद पडल्याने प्रवाशांना श्वास घेताना त्रास होऊ लागला. एसी बंद पडल्याने अस्वस्थ होऊन तीन ते चार प्रवासी बेशुद्ध पडले. यानंतर ही एसी लोकल पूर्णपणे रद्द करण्यात आली. सकाळी लोकलमधून विद्यार्थी व कर्मचारी मोठ्या संख्येने प्रवास करतात. या सर्व प्रवाशांचा खोळंबा झाला.

या प्रवाशांचे व्हिडिओ सोशल मीडियावर व्हायरल होत आहेत. या व्हिडिओमध्ये स्थानकावर बंद पडलेली एसी लोकल दिसून येत आहे. एसी लोकलमध्ये प्रवासी बेशुद्ध पडल्यानंतर त्यांना लोकलमधून बाहेर काढण्यात आलं. या व्हिडिओमध्ये दोन महिला आणि एक पुरुष प्रवासी बेशुद्ध अवस्थेत दिसत आहेत. इतर प्रवाशांनी त्यांना रेल्वे स्थानकावर बाकड्यावर बसवून त्यांना पाणी दिलं. त्यांना वारं घालून पुन्हा शुद्धिवर आणण्याचा प्रयत्न सुरू केला. या घटनेमुळे प्रवाशांमध्ये भीतीचं वातावरण निर्माण झालं.

एसी लोकल दुरुस्तीसाठी पाठवणार

अशा तांत्रिक बिघाडामुळे प्रवाशांना प्रचंड त्रास सहन करावा लागतो. आता या बिघाड झालेल्या लोकलच्या इतर फेऱ्याही रद्द करण्यात आल्या आहेत. त्याऐवजी सामान्य लोकलसेवा चालवली जाणार आहे. लोकलमध्ये काय बिघाड झाला आहे ते पाहून दुरुस्तीसाठी या एसी लोकलला कार्यशाळेत पाठवण्यात येईल. पण त्या लोकलने प्रवास करणाऱ्यांना मोठा मनस्ताप सहन करावा लागला होता.

Konkan Railway: कोकणवासियांची ‘कन्फर्म’साठी आराधना सुरू, गणपतीसाठी आरक्षण खुले; रेल्वे आणि एसटीचं वेळापत्रक जाहीर

मध्य रेल्वेवर सकाळी सीएसएमटीच्या दिशेने जाणाऱ्या प्रवाशांची संख्या मोठी असते. त्यामुळे अशा गर्दीच्या काळात आरामदायी प्रवासासाठी प्रवासी एसी लोकलचा पर्याय निवडतात. एसी लोकलचे दरवाजे आणि खिडक्या बंद असल्यामुळे तांत्रिक बिघाड झाला की धोका वाढतो. सध्या मध्य आणि पश्चिम रेल्वेवर एसी लोकलच्या फेऱ्या वाढवण्यात येत आहेत. त्यासाठी अनेक साधारण लोकल गाड्या रद्द करण्यात येत आहेत. एसी लोकलचं भाडं सर्वसामान्य प्रवाशांना परवडत नसल्यामुळे त्यांचा या निर्णयाला विरोध आहे. एसी लोकलमुळे सामान्य लोकलचं वेळापत्रक खोळंबतं असा अनेकांचा आरोप आहे. तसेच, गर्दीच्या वेळी जर प्रवासी दरवाजाबाहेर लटकत असले तर दरवाजे बंद होत नाहीत. यामुळे हा पर्याय सुरक्षित मानला जातो. पण अशा घटनांमुळे सुरक्षेवर पुन्हा एकदा प्रश्नचिन्ह उपस्थित करण्यात येत आहे.

वाढत्या एसी लोकलमुळे मध्य रेल्वेच्या प्रवाशांना खरचं फायदा होत आहे का? सर्व सामान्यांसाठी नॉन-एसी लोकल वाढवल्या पाहिजेत का ? तुमचं मत कमेंट्समध्ये नक्की सांगा