तालुक्यातील रामपूर-पुतळेवाडी येथे शनिवारी (दि. ४) रात्री राबविण्यात आलेल्या गुप्त मोहिमेत तब्बल १७ लाख ३७ हजार ५२९ रुपयांचा दूध पावडरचा विनापरवाना साठा जप्त करण्यात आला. या प्रकरणी प्रशांत रोहिदास काळे (वय २३, रा. रामपूर-पुतळेवाडी) याच्याविरुद्ध वावी पोलिसांत गुन्हा दाखल करण्यात आला आहे.

अन्न व औषध प्रशासनाचे नवे आयुक्त तुकाराम मुंडे यांनी पदभार स्वीकारल्यानंतर राज्यभर भेसळखोरांविरोधात मोहीम छेडली आहे. त्याचाच भाग म्हणून नाशिक विभागाचे सहआयुक्त मंगेश माने यांच्या मार्गदर्शनाखाली ‘एफडीए’चे पथक शनिवारी सिन्नरच्या पूर्व भागात दाखल झाले.

Nashik FDA Raid: नाशिकमध्ये FDAची मोठी कारवाई; दोन दिवसांत 7 हॉटेलांचे परवाने तत्काळ निलंबित, काय कारण?
अन्न सुरक्षा अधिकारी संदीप तोरणे यांनी दिलेल्या फिर्यादीनुसार, प्रशांत काळे याने कोणताही वैध अन्न परवाना अथवा खरेदी-विक्रीची कागदपत्रे नसताना मोठ्या प्रमाणात दूध पावडरचा साठा केला होता. हा साठा दूध भेसळीसाठी वापरला जाणार असल्याचा संशय व्यक्त करण्यात आला. याप्रकरणी भारतीय न्याय संहिता तसेच अन्न सुरक्षा व मानके कायद्यांतर्गत गुन्हा दाखल करण्यात आला असून, उपनिरीक्षक प्रमोद सरोवर अधिक तपास करीत आहेत.

‘मोठे मासे’ रडारवर ?
‘एफडीए’च्या पथकाने दूध भेसळीशी संबंधित आणखी काही ठिकाणांची तपासणी केल्याची चर्चा आहे. काही खवा उत्पादन केंद्रांवरही कारवाई झाल्याची माहिती समोर येत असून, दूध भेसळीच्या साखळीतील काही ‘मोठे मासे’ प्रशासनाच्या रडारवर असल्याची चर्चा आहे. मात्र, याबाबत अधिकृतरीत्या कोणतीही माहिती देण्यात आलेली नाही.

आषाढी वारीत वारकऱ्यांसाठी प्रथमच ‘एअर अ‍ॅम्ब्युलन्स’; Emergency स्थितीत वेळेत उपचार मिळणार, आरोग्य विभागाचा निर्णय
पुण्यातही दूध भेसळीवर कारवाई
मंचर, आंबेगाव, शिरूर परिसरांत दूध भेसळीच्या संशयावरून अन्न व औषध प्रशासन (एफडीए) आणि पुणे ग्रामीण पोलिसांनी रविवारी कारवाई केली. या कारवाईत १३ जणांना ताब्यात घेण्यात आले असून, दूध आणि खव्याचे नमुने तपासणीसाठी जप्त करण्यात आल्याची माहिती सूत्रांनी दिली. या भेसळीमध्ये जिल्ह्यातील दोन मोठ्या कंपन्यांसह अन्य काहींचा सहभाग असल्याचा संशय व्यक्त करण्यात येत आहे. पुणे जिल्ह्यासह विभागात कारवाई सुरू असल्याने लवकरच याबाबत अधिकृत माहिती देण्यात येईल, असे ‘एफडीए’ प्रशासनाने सांगितले. मंचर हे भेसळीचे मुख्य केंद्र असल्याचे तपासातून समोर आले आहे. मंचरमधून दोन संशयितांना ताब्यात घेतल्यानंतर या प्रकरणाचा उलगडा झाल्याचे अधिकाऱ्यांनी सांगितले. एफडीए प्रशासनाला याबाबत गोपनीय माहिती मिळाली.