२८ मेपर्यंत अर्जाची मुदत

म्हाडाच्या अधिकृत संकेतस्थळावरून इच्छुकांना २८ मे रोजी रात्री ११.५९ वाजेपर्यंत ऑनलाइन अर्ज करता येणार आहे. यापूर्वी अर्जाची अंतिम मुदत १४ मे होती. मात्र अर्जदारांचा वाढता प्रतिसाद लक्षात घेऊन मुदत वाढवण्यात आली. आता ही मुदत पुन्हा वाढवली जाणार की नाही, याबाबत अद्याप कोणतीही माहिती देण्यात आलेली नाही.

अर्जासाठी कोणती कागदपत्रं?

अर्ज करताना आधारशी लिंक असलेला मोबाईल क्रमांक, ई-मेल आयडी, आधार कार्ड, पॅन कार्ड, अधिवास प्रमाणपत्र, उत्पन्नाचा दाखला आणि आयकर विवरणपत्र आवश्यक आहे. विवाहित अर्जदारांसाठी पती किंवा पत्नीचे आधार व पॅन कार्ड बंधनकारक आहे. तसेच जात प्रमाणपत्र, विशेष प्रवर्गाशी संबंधित कागदपत्रे आणि विधवा अर्जदारांसाठी मृत्यू प्रमाणपत्रही जोडावे लागणार आहे.

Ambenali Ghat Accident: ‘त्यांची जागा मी भरून काढू शकत नाही’; आंबेनळी घाटातील मृतांच्या कुटुंबीयांना धीर देताना उदयनराजे गहिवरले

ईएमडीसाठी शेवटची तारीख

ऑनलाइन अर्ज २८ मेपर्यंत करता येणार असले तरी अनामत रक्कम म्हणजेच ईएमडी भरण्यासाठी २९ मे रोजी रात्री ११.५९ वाजेपर्यंत मुदत देण्यात आली आहे. अर्जदारांना संबंधित बँकेच्या कामकाजाच्या वेळेत RTGS किंवा NEFT द्वारे ही रक्कम जमा करावी लागणार आहे.

अंतिम यादी कधी?

म्हाडाच्या वेळापत्रकानुसार १० जून रोजी दुपारी ३ वाजता पात्र अर्जदारांची प्राथमिक यादी जाहीर केली जाणार आहे. त्यानंतर १२ जूनपर्यंत हरकती आणि दावे नोंदवण्याची संधी दिली जाईल. अंतिम पात्र यादी १६ जून रोजी प्रसिद्ध होणार आहे. त्यानंतर संगणकीकृत सोडतीची तारीख आणि वेळ जाहीर केली जाणार आहे.

काही घरांच्या किंमतीत कपात

म्हाडाने काही घरांच्या किंमतीतही कपात केली आहे. विक्रोळीतील १,२२१ घरांच्या किमतीत सुमारे ७.५ टक्के घट करण्यात आली आहे. यामधील ६१० घरांची श्रेणी मध्यम उत्पन्न गटातून उच्च उत्पन्न गटात बदलण्यात आली आहे. त्यामुळे काही अर्जदारांना दिलासा मिळण्याची शक्यता आहे.

६६ टक्के घरे अजून बांधकामाधीन

या सोडतीतील २,६४० घरांपैकी तब्बल १,७६२ घरे अजून बांधकामाधीन आहेत. ही घरे प्रामुख्याने विक्रोळी, गोरेगाव आणि बोरीवली परिसरात आहेत. बोरीवली पूर्वेत १२८, गोरेगाव पश्चिमेत ८५ तर उर्वरित घरे विक्रोळीतील कन्नमवार नगर परिसरात आहेत.

घरांच्या किंमती किती?

या सोडतीतील सर्वात महाग घर दक्षिण मुंबईतील ताडदेव येथे असून त्याची किंमत सुमारे ६.८२ कोटी रुपये आहे. तर आर्थिकदृष्ट्या दुर्बल घटकांसाठी मानखुर्दमध्ये उपलब्ध घरांची सुरुवातीची किंमत सुमारे २९ लाख रुपये आहे. गोरेगावमधील ३०० चौरस फुटांच्या घराची किंमत सुमारे ३२ लाख रुपये ठेवण्यात आली आहे. मुंबईत परवडणाऱ्या घरांच्या मर्यादित पर्यायांमध्ये म्हाडाची ही सोडत सर्वसामान्यांसाठी मोठी संधी मानली जात आहे.