नेमकं प्रकरण काय?

पुणे जिल्ह्यातील शिरुर तालुक्यातील दहिवडी-मांजरेवस्ती परिसरात राहणारा १२ वर्षांचा चिमुरडा सायंकाळपर्यंत घरी न परतल्याने कुटुंबीयांनी शोध मोहीम सुरू केली. शोध घेत असताना घराजवळील विहिरीकाठी, ऊसाच्या शेताजवळ त्याचं प्रेत आढळून आलं होतं. शरीरावरील जखमा आणि एकूण परिस्थिती पाहता सुरुवातीला वन्य प्राण्याच्या हल्ल्याचा संशय व्यक्त करण्यात आला होता. मात्र घटनास्थळावरील परिस्थिती आणि स्थानिकांचा संशय यामुळे पोलिसांनी तपासाची दिशा तातडीने बदलली.

समलैंगिक संबंधास नकार दिला म्हणून…

तपासादरम्यान वेगळंच सत्य बाहेर आले आहे. तांत्रिक पुरावे आणि चौकशीच्या आधारे पोलिसांनी नात्यातीलच २२ वर्षीय अक्षय नामक तरुणाला ताब्यात घेतले. कसून चौकशीत त्याने गुन्ह्याची कबुली दिल्याची माहिती पोलिसांनी दिली. प्राथमिक तपासानुसार समलैंगिक संबंधास नकार दिल्याच्या कारणावरून संतापाच्या भरात हा खून करण्यात आल्याचा संशय व्यक्त होत आहे.

संशय येऊ नये म्हणून गर्दीत मिसळला

या प्रकरणातील सर्वाधिक धक्कादायक बाब म्हणजे, गुन्हा केल्यानंतर आरोपीने कोणाचाही संशय येऊ नये म्हणून घटनास्थळी जमलेल्या गर्दीत स्वतःला मिसळून घेतल्याचे समोर आले आहे. या कृतीमुळे तपास अधिक गुंतागुंतीचा झाला होता.

आरोपी अटक, चौकशी सुरु

पोलिसांनी वेगवान हालचाली करत काही तासांतच प्रकरणाचा उलगडा केला असून, आरोपीला अटक करण्यात आली आहे. या घटनेमुळे परिसरात भीती आणि संतापाचे वातावरण निर्माण झाले असून, मुलांच्या सुरक्षेबाबत पालकांमध्ये तीव्र चिंता व्यक्त होत आहे.