कल्याण डोंबिवली महापालिकेच्या १२२ जागांसाठी १५ डिसेंबर २०२५ रोजी निवडणुकीची अधिसूचना प्रसिद्ध झाली होती. ३० डिसेंबरपर्यंत उमेदवारी अर्ज भरल्यानंतर १ जानेवारी २०२६ पासून प्रत्यक्ष प्रचाराला सुरुवात झाली. दोन आठवडे चाललेल्या या धडाकेबाज प्रचारात आरोप-प्रत्यारोपांच्या फैरी झाडण्यात आल्या. १३ जानेवारीला प्रचाराच्या तोफा थंडावल्या आणि आज, १५ जानेवारी २०२६ रोजी शहरात उत्साहात मतदान पार पडले.

या निवडणुकीत भाजप आणि शिवसेना (शिंदे गट) यांनी युती न करता स्वतंत्रपणे निवडणूक लढवल्याने ही लढत अधिकच चुरशीची ठरली.

कोणाची सरशी?

साम टीव्हीने प्रसिद्ध केलेल्या एक्झिट पोलनुसार, कल्याण डोंबिवलीवर मुख्यमंत्री एकनाथ शिंदे यांच्या नेतृत्वाखालील शिवसेना शिंदे गटाचे वर्चस्व राहण्याची शक्यता आहे. या पोलनुसार शिंदे गट महापालिकेतील सर्वात मोठा पक्ष म्हणून समोर येताना दिसत आहे.

Pune Election Exit Poll 2026: पुण्याचा नवा ‘कारभारी’ कोण होणार? पुणे महापालिका एक्झिट पोलची मोठी आकडेवारी समोर

एक्झिट पोलमधील अंदाजित जागा

एकूण जागा १२२

• पक्ष आणि अंदाजित जागा

शिवसेना (शिंदे गट) ५७
भारतीय जनता पार्टी (BJP) ४२
महाराष्ट्र नवनिर्माण सेना (MNS) ०६
शिवसेना (UBT)०२काँग्रेस ०२
राष्ट्रवादी (शरद पवार गट) ०२
वंचित बहुजन आघाडी ०२
इतर व अपक्ष ०६

भाजप-शिवसेनेत राडा; सत्ता कुणाची?

दरम्यान, भाजपचे प्रदेशाध्यक्ष रवींद्र चव्हाण यांचा प्रभाव असलेल्या या क्षेत्रात भाजपने ४२ जागांपर्यंत मजल मारण्याचा अंदाज आहे. मात्र, ५७ जागांसह शिंदे गट बहुमताच्या जवळ पोहचताना दिसत आहे. प्रचारादरम्यान भाजप आणि शिंदे गटाच्या कार्यकर्त्यांमध्ये अनेक ठिकाणी राडे आणि वादाचे प्रसंग पाहायला मिळाले होते. या वादाचा परिणाम निकालावर काय होतो, हे पाहणे महत्त्वाचे ठरेल. मनसेला ६ जागा मिळण्याचा अंदाज असल्याने, किंगमेकरच्या भूमिकेत राज ठाकरे यांची भूमिका महत्त्वाची ठरू शकते.

उद्या, १६ जानेवारी २०२६ रोजी सकाळी ८ वाजेपासून मतमोजणीला सुरुवात होईल आणि दुपारपर्यंत केडीएमसीचा नवा ‘कल्याण’कारी राजा कोण, हे स्पष्ट होईल.