“आम्ही काय बांगड्या घातल्यात का?” लांडगेंचा इशारा

भोसरीचे आमदार महेश लांडगे यांनी एका सभेत बोलताना अजित पवारांच्या जुन्या ‘करेक्ट कार्यक्रम’ करण्याच्या इशाऱ्याचा समाचार घेतला. पवारांची मिमिक्री करत लांडगे म्हणाले, “तू कार्यक्रम करतो, तर आम्ही काय बांगड्या घातल्यात का? आमच्या रणरागिणी आणि देवेंद्र फडणवीसांच्या लाडक्या बहिणीच तुझा कार्यक्रम करतील.” एवढेच नव्हे तर, अजित पवार हे महाराष्ट्राचे ‘आका’ असल्याचा घणाघात करत त्यांनी पवारांच्या कार्यपद्धतीवर प्रश्नचिन्ह उपस्थित केले. “आता मी तुमच्या वाकड्यात गेलोय, बघू काय होतंय,” असे थेट आव्हानच त्यांनी दिले.

सुनेत्रा पवारांची भोसरीत फिल्डिंग

पतीवर झालेल्या या वैयक्तिक हल्ल्यानंतर सुनेत्रा पवार यांनी भोसरीत धाव घेतली. लांडगे यांच्या बालेकिल्ल्यात त्यांनी सलग चार तास बैठकांचे सत्र राबवले. लांडगेंनी केलेल्या टीकेवर त्यांनी कोणतेही भाष्य केले नाही, मात्र त्यांच्याच मतदारसंघात कार्यकर्त्यांची मोठी जुळवाजुळव करून “मी पण मैदानात उतरले आहे,” असे स्पष्ट संकेत विरोधकांना दिले आहेत.

वाशिम हादरले! स्टेशन परिसरात महिलेवर आधी अत्याचार, मग क्रूर हत्या; घटनास्थळावरील ‘त्या’ वस्तू पाहून पोलीसही चक्रावले

सुनेत्रा पवारांच्या या सक्रियतेमुळे अजित पवार गटाने भोसरीत भाजपला घेरण्याची रणनीती आखल्याचे स्पष्ट होत आहे.

अजित पवारांचा खोचक टोला

या संपूर्ण प्रकरणावर अजित पवारांना विचारले असता त्यांनी आपल्या खास शैलीत उत्तर दिले. “महेश लांडगे हे मोठे नेते आहेत आणि मोठ्या नेत्याने छोट्या नेत्याला एकेरीच बोलायचे असते. आपण जसे घरच्या गड्याला ‘ये पाणी आण’ म्हणतो, तसेच त्यांना मी ‘चिल्लर’ वाटत असेन, म्हणून ते माझा एकेरी उल्लेख करत आहेत,” असा उपरोधिक टोला त्यांनी लगावला.

महायुतीत असूनही पिंपरी-चिंचवडमध्ये भाजप विरुद्ध अजित पवार गट असा हा थेट सामना आता अधिक धारदार झाला असून, येणाऱ्या काळात याचे पडसाद संपूर्ण जिल्ह्याच्या राजकारणात उमटणार आहेत.