प्रभाग क्रमांक तीनमधून कृष्णराज महाडिक यांनी शनिवारी उमेदवारी अर्ज दाखल केला होता. मात्र रविवारी त्यांनी अधिकृत निवेदन देत निवडणूक न लढवण्याची घोषणा केली. भाजपच्या उच्च पातळीवर आमदार आणि खासदार यांच्या कुटुंबियांना तिकीट न देण्याचा निर्णय घेण्यात आल्याचे कळते. त्या आदेशाचा मान राखत महाडिक यांनी आपली उमेदवारी मागे घेतली आहे.

आपल्या निवेदनात कृष्णराज महाडिक म्हणतात, “भारतीय जनता पक्ष ही शिस्तबद्ध आणि संघटित राजकीय पक्ष आहे. पक्षाचा आदेश शिरसावंद्य मानणे हे प्रत्येक कार्यकर्त्याचे कर्तव्य आहे. त्यानुसार पक्षीय पातळीवर झालेल्या निर्णयाचा आदर राखून मी कोल्हापूर महानगरपालिकेची निवडणूक लढवणार नाही, असे जाहीर करीत आहे. माझ्या नावाचा विचार झाला, ही माझ्यासाठी समाधानाची बाब आहे. पुढेही समाजकारण आणि पक्षकार्यात मी सक्रिय राहणार आहे.”

भाजपने यावेळी महायुतीच्या घटक पक्षांसह महानगरपालिका निवडणूक एकत्र लढवण्याचा निर्णय घेतला आहे. इच्छुक कार्यकर्त्यांची संख्या मोठी असल्याने तिकीट निवड प्रक्रियेला विशेष महत्त्व प्राप्त झालं आहे. कृष्णराज महाडिक यांनी घेतलेला हा निर्णय पक्षातील इतर इच्छुकांसाठी संधी निर्माण करणारा ठरला आहे.

दरम्यान, महाडिक यांच्या माघारीनंतर प्रभाग क्रमांक तीनसह अधिकृत भाजप उमेदवारांची नवी नावे निश्चित करण्याची प्रक्रिया पक्ष पातळीवर सुरू असून, लवकरच निर्णय जाहीर होण्याची शक्यता व्यक्त केली जात आहे. तर कृष्णराज यांच्या माघारीमुळे स्थानिक राजकीय चर्चेला वेग आल्याचे चित्र पाहायला मिळत आहे.