नाशिकमध्ये खलबतं

नाशिकमधील एका नामांकित हॉटेलमध्ये आज गिरीश महाजन यांनी शहरातील आमदार, प्रमुख नेते आणि पदाधिकाऱ्यांची भेट घेतली आणि चर्चा केली आहे. आगामी निवडणुकांच्या पार्श्वभूमीवर ही बैठक अत्यंत महत्त्वाची मानली जात आहे. या बैठकीनंतर महाजनांनी यावेळी माध्यमांशी संवाद साधला. त्यांनी मित्रपक्षांमधील पदाधिकारी आणि कार्यकर्त्यांच्या फोडाफोडीवर मनमोकळेपणाने भाष्य केले.

‘त्यांनी एक घेतला, तर आम्ही दोन घेऊ’

महायुतीमध्ये मित्रपक्षातील कार्यकर्त्यांचे पक्षप्रवेश होऊ नयेत, असे ठरले असल्याचे महाजन यांनी मान्य केले. मात्र, सध्याची परिस्थिती वेगळी असल्याचे सांगताना ते म्हणाले, “सुरुवात कोणीतरी करतं आणि मग एक साखळी तयार होते. त्यांनी आमचा एक घेतला की आम्ही त्यांचे दोन घेतो आणि आम्ही दोन घेतले की ते तीन घेतात. सध्या हेच चित्र आहे,” असं महाजन म्हणाले आहेत.

पक्षातील ‘इन्कमिंग’ सुरूच राहणार?

दरम्यान, गिरीश महाजन यांच्या या विधानाचा स्पष्ट अर्थ असा होतोय की, मित्रपक्षांमधील नाराजांना भाजपकडे ओढण्याची प्रक्रिया थांबणार नाही. ‘निवडणुकीत सर्व काही जायज आहे’ असे म्हणत त्यांनी पक्षातील ‘इन्कमिंग’ सुरूच राहील, असेच संकेत दिले असल्याचे राजकीय विश्लेषकांनी म्हटले आहे. यामुळे महायुतीतील मित्रपक्षांमध्ये आगामी काळात मोठी रस्सीखेच पाहायला मिळण्याची शक्यता निर्माण झाली आहे.

त्यामुळे आता ऐन निवडणुकीच्या काळात मित्रपक्षांमधील हे इनकमिंग कोणाला फायद्याचे ठरते आणि गिरीश महाजन यांनी मारलेला हा ‘फिल्मी’ डायलॉग आता कोणाकोणाच्या मुखी येतो, हे पाहणे औत्सुक्याचे ठरणार आहे.