महापालिकेकडून लवकरच आणखी 296 घरांसाठीही सोडत प्रक्रिया राबवली जाणार आहे. मुंबई महापालिकेने विकास नियंत्रण नियमावलीत नुकतेच बदल केले आणि प्रिमियम बदल्यात विकासकांकडून घरे प्राप्त करण्याचा निर्णय घेतला. त्यानुसार महापालिकेला विकासकांकडून 426 घरे प्राप्त होताच त्याची विक्री सोडत पद्धतीने करण्याचा निर्णय घेण्यात आला. ही सोडत गेल्या तीन आठवड्यांपेक्षा जास्त दिवस रखडली होती. या सोडतीला अखेर शनिवारी मुहूर्त मिळाला.
Mumbai Home : ‘सेंच्युरी’च्या जागेवर गिरणी कामगारांना घरे, रहिवासी संकुल उभारणार; काय आहे महापालिकेची योजना?
या घरांसाठी दोन हजारपेक्षा जास्त अर्ज आले होते. घरांच्या अव्वाच्या सव्वा किंमतीमुळे मिळालेला प्रतिसाद अल्पच होता. या घरांसाठी 20 नोव्हेंबरला सायंकाळी ऑनलाईन सोडत काढली जाणार होती. मात्र, तांत्रिक कारणामुळे ही सोडत रखडली आणि शनिवारी सायंकाळी चार वाजता सोडत काढण्यात आली. यातील काही घरे एससी, एनटी, पत्रकार, स्वातंत्र्यसैनिक यासह विविध श्रेणींसाठी राखीव ठेवण्यात आली होती. अशा 53 घरांना या सोडतीत प्रतिसाद मिळाला नाही.

दोन हजारपेक्षा जास्त अर्ज आले असताना प्रत्यक्ष सोडतीत 426 पैकी 373 घरांनाच प्रतिसाद मिळाला. सदनिका विजेत्या यशस्वी अर्जदारांना ईमेलद्वारे कळवण्यात येईल. घरविक्रीतून पालिकेला 250 कोटी रुपये मिळतील.
रहिवासी सोसायटी बनवण्यास टाळाटाळ करणाऱ्या बिल्डरवर कठोर कारवाई होणार, विधान परिषदेत विधेयक मंजूर

भांडुपकडे पाठ

अंधेरी पूर्व मरोळ, त्यापाठोपाठ जोगेश्वरी पूर्व मजास गाव, दहिसर सागर वैभव सोसायटी, भांडुप पश्चिम एलबीएस मार्ग, कांदिवली पूर्व वाढवण, कांदिवली पश्चिम त्रिलोक पार्क, भायखळा प्रेस्टीज जासदान, कांजुरमार्ग, गोरेगाव पश्चिम पिरामलनगर आदी ठिकाणी घरे आहेत. यापैकी भांडुपमधील 240 घरांसाठी 129 अर्ज प्राप्त झाले होते. प्रतिसाद न मिळालेल्या 53 घरांपैकी बहुतांश घरे भांडुपमधीलच आहेत. त्यानंतर भायखळा, अंधेरी मरोळ, जोगेश्वरी पूर्व, गोरेगाव पश्चिम पिरामनगर, कांजुरमार्ग येथीलही काही घरांना प्रतिसाद मिळालेला नाही. 66 लाखांपासून ते एक कोटी रुपयांपेक्षा अधिक किंमतीची घरे यात होती. आमदार, खासदारांसाठीही यात कोटा आहे.

दिव्यांग नागरिकांसाठी सोडत

मुंबई महापालिकेच्या बाजार विभागामार्फत महापालिका मंडईमध्ये पाच टक्के दिव्यांग आरक्षणांतर्गत दिव्यांग नागरिकांना व्यवसाय करण्यासाठी अनुज्ञापत्र व गाळे, स्टॉल, जागा इत्यादींचे ऑनलाइन पद्धतीद्वारे सोडतही शनिवारी महानगरपालिका मुख्यालयात आयोजित करण्यात आली होती. या सोडतीदरम्यान एकूण 43 यशस्वी दिव्यांग लाभार्थी अर्जदारांची घोषणा करण्यात आली. तसेच प्रतीक्षा यादीवरील 43 दिव्यांग लाभार्थी अर्जदारांची यादीही जाहीर करण्यात आली आहे. संकेतस्थळावर ही माहिती मिळेल.