याबाबतची सविस्तर माहिती अशी की, मूळची सोलापूरची असलेली पिंकी (नाव बदलले आहे) मे महिन्यामध्ये आई-वडिलांसोबत मुंबईत आली होती. मात्र 20 मे रोजी छत्रपती शिवाजी महाराज टर्मिनस परिसरातून एका तरुणाने तिचं अपहरण केलं. याप्रकरणी माता रमाबाई आंबेडकर मार्ग पोलिस ठाण्यात गुन्हा दाखल झाल्यानंतर, उपायुक्त प्रवीण मुंढे यांच्या नेतृत्वाखाली चार पोलिसांची पथके तयार करण्यात आली होती. सीसीटीव्ही फुटेजमधून अपहरण करणारा तरुण पिंकीला लोकमान्य टिळक टर्मिनस इथं घेऊन गेला व तिथून त्याने बनारसला जाणारी ट्रेन पकडल्याचं समोर आलं.

पोलिसांनी मुंबई ते वाराणसी दरम्यानच्या सर्व रेल्वे स्थानकांवरील सीसीटीव्ही फुटेज तपासले. त्यानंतर वाराणसी परिसरात तरुण मुलीला घेऊन गेल्याचे कळताच पोलिसांचं एक पथक 10 ते 12 दिवस तिथं ठाण मांडून होतं. मात्र स्थानिक पोलिसांच्या मदतीने सर्व प्रयत्न करूनही या पथकाला यश आलं नाही. सप्टेंबरमध्ये पिंकीला शोधण्यासाठी पोलीस पुन्हा वाराणसीत पोहोचले, पण त्यावेळीही पोलिसांना रिकाम्या हाती परतावं लागलं.

आपल्यासमोरून झालेले अपहरण पोलिसांना स्वस्थ बसू देत नव्हते. वरिष्ठ निरीक्षक योगेश साबळे आणि वरिष्ठ निरीक्षक श्रीकांत आदाटे यांच्या मार्गदर्शनाखाली नऊ नोव्हेंबरला उपनिरीक्षक सूरज देवरे आणि उपनिरीक्षक रामप्रसाद चंदवाडे यांचे विशेष पथक पुन्हा वाराणसी पाठविण्यात आले. पोलिसांनी यावेळी वाराणसी येथील प्रसारमाध्यमे आणि संस्थांची मदत घेतली. पिंकीची माहिती आणि फोटो माध्यमांना पाठवण्यात आले. त्यावेळी मराठी भाषा बोलणारी एक लहान मुलगी बेपत्ता असल्याचे सांगण्यात आले. हे समजताच तेथील एका स्थानिक पत्रकाराने पोलिसांना एका मराठी बोलणाऱ्या मुलीची माहिती दिली. ही मुलगी वाराणसी येथील काशी अनाथ आश्रमात असल्याचे त्याने सांगितले. पोलिसांनी तात्काळ आश्रम गाठला असता ती पिंकीच असल्याचे दिसून आले. बेवारस फिरणाऱ्या मुलीला एका महिलेने स्थानिक पोलिसांकडे आणले आणि पोलिसांनी या आश्रमात ठेवल्याचे स्पष्ट झाले. पोलिसांनी पिंकीला मुंबईत आणून पालकांच्या स्वाधीन केले. पिंकी सापडली मात्र तिला पळविणारा तरुण मात्र अद्याप फरार आहे आणि पोलिस त्याचा शोध घेत आहेत.