महिलेच्या अवयवदानासाठी ऑस्ट्रेलियाच्या दूतावासाची परवानगी आवश्यक होती. महिलेचे नातेवाइक, रुग्णालय प्रशासन आणि प्रादेशिक प्रत्यारोपण समन्वय समितीच्या (झेडटीसीसी) प्रयत्नांमुळे रविवार सुट्टीचा दिवस असतानाही ऑस्ट्रेलियाच्या दूतावासाची परवानगी मिळाली. त्यामुळे योग्य वेळेत प्रत्यारोपणाच्या शस्त्रक्रिया करणे शक्य झाले.

लोणावळ्याची महिला, ऑस्ट्रेलियात वास्तव्य

ही महिला मूळची पुणे जिल्ह्यातील लोणावळा येथील होती. गेल्या काही वर्षांपासून महिला आणि त्यांचे कुटुंब ऑस्ट्रेलियातील मेलबर्न येथे राहत होते. दिवाळी साजरी करण्यासाठी त्यांचे कुटुंब लोणावळा येथे आले होते. या कालावधीत या महिलेला अचानक डोकेदुखीचा त्रास झाल्याने उपचारांसाठी चिंचवड येथील आदित्य बिर्ला रुग्णालयात दाखल करण्यात आले. मात्र, उपचारादरम्यान महिलेला मेंदूमृत (ब्रेन डेड) घोषीत करण्यात आले.

दुःखातून सावरून या महिलेच्या पतीने आणि भावाने महिलेच्या अवयवदानाचा निर्णय घेतला; मात्र ही महिला ऑस्ट्रेलियाची नागरिक असल्याने अवयवदानासाठी ऑस्ट्रेलियाच्या दूतावासाची परवानगी घेणे आवश्यक होते.
Pune News : आळंदीला निघालेल्या दिंडीत ट्रेलर घुसला, प्रख्यात महिला कीर्तनकाराचा करुण अंत, अनेक वारकरी जखमी
हॉस्पिटलने ऑस्ट्रेलियाच्या दूतावासाला ई-मेल पाठवून परवानगी मागितली; मात्र रविवार (दोन नोव्हेंबर) असल्याने तातडीने परवानगी मिळवणे कठीण होते. रुग्णालय प्रशासन, मनुष्यबळ विकास विभाग, प्रत्यारोपण पथकातील सदस्य, डॉ. उर्वी शुक्ला, प्रत्यारोपण समन्वयक वैशाली पवार, महिलेचे पती आणि ‘झेडटीसीसी’च्या डॉ. शीतल महाजनी, डॉ. वृषाली पाटील यांच्या प्रयत्नांमुळे परवानगी मिळाली.
Mumbai Crime : बापरे! मुंबईत 29 वर्षीय तरुणीवर दिवसाढवळ्या अत्याचाराचा प्रयत्न, सुधीर फडके पुलाखाली ओढून नेलं आणि…
त्यानंतर अवयव वाटपाच्या मार्गदर्शक तत्त्वांनुसार तीन नोव्हेंबरला ‘झेडटीसीसी’ने अवयवांचे वाटप केले. डॉ. डी. वाय. पाटील रुग्णालयाला एक मूत्रपिंड (किडनी) आणि यकृत देण्यात आले. दीनानाथ मंगेशकर रुग्णालयाला एक मूत्रपिंड, तर मुंबईतील एच. एन. रिलायन्स हॉस्पिटलला हृदय देण्यात आले. या चारही रुग्णांवर शस्त्रक्रिया करण्यात आल्याचे ‘झेडटीसीसी’ने सांगितले.