Ajit Pawar NCP: राष्ट्रवादी काँग्रेसने 17 प्रवक्त्यांची नवी यादी जाहीर केली असून यात अमोल मिटकरी, रूपाली पाटील-ठोंबरे यांच्यासह काही जुन्या प्रवक्त्यांना डच्चू मिळाला आहे. मात्र रूपाली चाकणकर यांचे नाव कायम आहे. यावरून सुषमा अंधारे यांनी वेगळाच संशय व्यक्त केला आहे.
पुणे : उपमुख्यमंत्री अजित पवार यांच्या नेतृत्वातील राष्ट्रवादी काँग्रेस नुकतीच 17 प्रवक्त्यांची नावे जाहीर केली आहेत. यामध्ये जुन्या प्रवक्त्यांपैकी विधान परिषदेचे आमदार अमोल मिटकरी, रूपाली पाटील-ठोंबरे, वैशाली नागवडे आणि संजय तटकरे यांची गच्छंती करण्यात आली आहे, तर रूपाली चाकणकर यांचं नाव कायम ठेवण्यात आलं आहे. पक्षाची बाजू लावून धरणाऱ्या अमोल मिटकरी आणि रूपाली पाटील ठोंबरे यांचं नाव प्रवक्तेपदावर नसल्यामुळे राजकीय वर्तुळात हा चर्चेचा विषय ठरला आहे. पक्षाची बाजू लावून धरताना महायुतीतील पक्षांच्या विरोधात भूमिका घेणे हे अमोल मिटकरी यांना महागात पडल्याची चर्चा आहे, तर राज्य महिला आयोगाच्या अध्यक्षा रूपाली चाकणकर यांच्याविरोधात जाहीर भूमिका घेणे हे रूपाली पाटील यांच्या गच्छंतीचं कारण असल्याचं बोललं जात आहे.
रूपाली पाटील यांच्या गच्छंतीनंतर शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे यांनी वेगळाच संशय व्यक्त केला आहे. अजित पवारांचा पक्ष हळूहळू सुनील तटकरे टेकओव्हर तर करत नाहीत ना, असा संशय सुषमा अंधारे यांनी व्यक्त केला आहे. “कुठल्याही पक्षाने पदाधिकारी नेमणे हा त्यांचा पूर्णतः अंतर्गत विषय आहे. मात्र तरीही राष्ट्रवादी काँग्रेसच्या या यादीतील एकूण नावं बघता एक फरक लक्षात येईल. अमोल मिटकरी आणि रूपाली ठोंबरे हे दोन्ही प्रवक्ते कायम दादांसाठी खिंड लढवत असतात, मात्र त्यांना या यादीत स्थान नाही,” असं म्हणत सुषमा अंधारे यांनी आश्चर्य व्यक्त केलं आहे.
‘मित्र पक्षातल्या आमदारांकडून अजितदादांवर पराकोटीची जहरी टीका होताना अतिशय मौन बाळगणारे सूरज चव्हाण तटकरेंवर कोणी चकार शब्द काढला तर अगदी मारामारी करण्यापर्यंतची तत्परता दाखवू शकतात. कदाचित म्हणूनच या यादीत सूरज चव्हाण यांना स्थान आहे. थोडक्यात काय जो अजितदादांची बाजू घेईल त्याला बाहेरचा रस्ता दाखवला जाईल. तटकरे हळूहळू पक्ष टेकओवर तर करत नाहीत ना? हा अजितदादांसाठी अलार्म आहे,” असा हल्लाबोल सुषमा अंधारेंनी केला आहे.
दुसरीकडे, राष्ट्रवादी काँग्रेसमधील रूपाली चाकणकर आणि रूपाली पाटील यांचा वाद गेल्या काही दिवसांपासून पेटलेला आहे. फलटण येथील उपजिल्हा रुग्णालयातील महिला डॉक्टरच्या आत्महत्येनंतर रूपाली चाकणकर यांनी महिला डॉक्टरचे चारित्र्यहनन केल्याचा आरोप करत रूपाली पाटील यांनी आपल्याच पक्षातील नेत्या रूपाली चाकणकर यांच्याविरोधात आंदोलन केलं होतं. तसंच माध्यमांमधून रूपाली चाकणकर यांच्याविरोधात थेट भूमिका घेतली होती. यानंतर पक्षाकडून रूपाली पाटील यांना कारणे दाखवा नोटीस देखील बजावण्यात आली आहे. नोटीस बजावल्यानंतर अवघ्या दोन दिवसातच रूपाली पाटील यांची प्रवक्तेपदावरून गच्छंती झाल्यामुळे रूपाली पाटील यांना चाकणकर यांच्यासोबत घेतलेला पंगा महागात पडला असल्याची चर्चा आहे.
कोण आहेत राष्ट्रवादीचे नवे प्रवक्ते?
अनिल पाटील, चेतन तुपे, सना मलिक, हेमलता पाटील, राजीव साबळे, सायली दळवी, रूपाली चाकणकर, आनंद परांजपे, शशिकांत तरंगे, राजलक्ष्मी भोसले, प्रतिभा शिंदे, प्रशांत पवार, ब्रिजमोहन श्रीवास्तव, अविनाश आदिक, सूरज चव्हाण, विकास पासलकर आणि श्याम सेनर.
लेखकाबद्दलअक्षय शितोळेअक्षय शितोळे | २०१८ पासून डिजिटल मीडियात कार्यरत असून सध्या मटा ऑनलाइनमध्ये प्रिन्सिपल डिजिटल कंटेंट प्रोड्युसर म्हणून जबाबदारी सांभाळत असताना राज्यभरातील रिपोर्टर्ससोबत समन्वय साधण्याचेही काम करत आहे. राजकीय बातम्यांमध्ये विशेष रस, बातम्यांमागची बातमी अर्थात घडामोडींचा विश्लेषणात्मक आढावा घेण्याचा सातत्याने प्रयत्न असतो. शेती आणि ग्रामीण जीवन हे जिव्हाळ्याचे विषय आहेत. यापूर्वी लोकमत, न्यूज १८ लोकमत आणि एबीपी माझा या संस्थांमध्येही कामाचा अनुभव असून मुंबईतील रूईया महाविद्यालयातून पत्रकारितेत पदवी प्राप्त केली आहे.… आणखी वाचा