दरम्यान, लाचखोर प्रमोद चिंतामणीच्या घरी ५१ लाख रुपयांची रोकड एसीबीच्या पथकाने कारवाईत जप्त केली आहे. धक्कादायक बाब म्हणजे दाखल गुन्ह्यामध्ये मदत करण्यासाठी आरोपी पीएसआय प्रमोद चिंतामणीने दोन कोटींची मागणी केली होती. हे दोन कोटी टप्प्याने मिळणार असे ठरले होते. पहिला हप्ता हा रविवारी २ नोव्हेंबरला दिला जाणार होता. दोन कोटींपैकी ४६ लाख ५० हजार स्वीकारताना पुण्यात लाचलुचपत प्रतिबंधक विभागाने पीएसआय चिंतामणीला रंगेहाथ पकडले आणि बेड्या ठोकल्या.

Pune Crime: पुण्यात टोळीयुद्ध पेटलं? बाजीराव रस्त्यावर भरदिवसा हत्येचा थरार, कोयत्याने वार करत मयांकला संपवलं!

त्यानंतर काल ३ नोव्हेंबर रोजी प्रमोद चिंतामणी राहत असलेल्या त्याच्या भोसरीतील घराची झडती घेण्यात आली. यावेळी त्याच्या घरातून ५१ लाख रुपयांची रोख कोरड एसीबीच्या पथकाला मिळाली आहे. जी जप्त करण्यात आली आहे. प्रमोद चिंतामणी मूळचा कर्जुले हरियाळ तालुका-पारनेर, जिल्हा अहिल्यानगर येथील आहे. या रोकडसहीत दागिने व मालमत्तेची कागदपत्रंही एसीबीने कारवाईत जप्त केली आहेत. याप्रकरणी आता सर्व दृष्टीकोनातून प्रमोद चिंतामणीची सखोल चौकशी केली जाणार आहे. आणखी एक धक्कादायक खुलासा म्हणजे दोन कोटींपैकी एक कोटी रुपये वरिष्ठ पोलिस निरीक्षक यांना दिले जाणार होते असा गौप्यस्फोट प्रमोदने एसीबी अधिकाऱ्यांच्या चौकशीत केला आहे. त्यामुळे आता या आर्थिक गुन्हे शाखेचे वरिष्ठ पोलिस निरीक्षकही चौकशीच्या फेऱ्यात येण्याची शक्यता वर्तवण्यात येत आहे.

दरम्यान, पोलिसांनीच अशा प्रकारे वर्तन करणे यावरून नागरिकांमध्येही तीव्र नाराजी आहे. संतापाची भावना व्यक्त केली जात आहे. सोशल मीडियावरुन अनेकांनी या प्रकरणाची सखोल चौकशी व्हावी आणि कठोर कारवाई व्हावी अशी मागणी केली जात आहे. त्याचवेळी आरोपीच्या गावाकडील संपत्तीचीही चौकशी करावी अशा स्वरुपाची मागणी जनसामान्यातून केली जात आहे.